Real Madrid an chak lo leh tawh

Match 40 chhung hneh loh tawng loa an kaltluan hnuah Real Madrid chu an match hnuhnung pahnihah an tlawm ta! Spanish club lian hian Copa del Rey first leg khel turin Celta Vigo an lo mikhual a, 2-1 in an chak lo.

Minute 10 chhungin

Nilaini zan inkhelah first half-ah goal a lut lo a, second half-a goal thum luh chhung erawh minute 10 chauh a ni. Celta hian Iago Aspas hmangin minute 64-naah goal hmahruai an khung, Liverpool forward hlui hin tun season inelna hrang hrangah goal 16 a khung tawh.

Liverpool tan match 15 a khelh aṭanga goal khat chiah khungtu Aspas hi tun La Liga-ah chuan hmatawng hlauhawm berte zinga mi a ni mek, a club tan hian a match hnuhnung 13 aṭangin goal 13 a khung thei.

Real an duai bik lo, si an phurh aṭanga minute nga hnu lekah defender Marcelo chuan a ke vei lamin an siphurh a sut. Bernabeu-a mipui lawma au thawm a reh hmain mikhualin Jonny hmangin chakna goal a khung zui ve leh.

Zidane a zam lo

Real Madrid manager Zinedine Zidane chuan, "Celta khan min hneh thei tih an lantir chiang hle, kan tan chuan ni ṭha lo leh lungchhiatthlak tak a ni. Kan result ṭha lo hi ka mawhphurhna a ni a, a chinfel dan pawh ka ngaihtuah chhuak ngei tur a ni. Hnehna chang turin kawng dik kan zawh leh thei tih ka chiang," tiin a sawi.

Zidane hian player a nih laia a lo hlawhtlinpui tawh Real Madrid hi manager a nih hnuah pawh a enkawl ṭha hle. Nikum Janaury ni 4 aṭang khan Real hi enkawl ṭanin kum 2016 chhung khan vawi hnih chiah a chak loh pui - Atletico Madrid leh Wolfburg chiah hneh loh an nei.

France manager kaihhruaina hnuaiah Real hian match 40 chhung zet hneh loh nei loa an kaltluan theih avangin fak an hlawh. Mahse, tun hnaiah beisei an phak lo. League lama an elpui ber Sevilla chu 2-1 in an hneh lo a, insiamṭhatna hun an neih hmasak berah an tlawm nawn - ni thum chhungin vawi hnih an chak lo!

Real an ral..?

Real Madrid hian semifinal an lut dawn a nih chuan tunhma lama an la tih theih ngai loh an tih a ngai dawn. Champions League nomawi ringawt pawh 10 kawl thei club hian Copa del Rey inelna bikah chuan first leg-a an chak loh hnuah hnehna an la chang let thei ngai lo.

Kum 1995 kha a ni a, Real Madrid hian first leg-ah Valencia chu 2-1 in an hneh lo a, inkhel pahnih belhkhawmah 4-2 in an chak lo zui bawk. Jose Mourinho kaihhruaina hnuaiah Barcelona chu an lo ngam lo tawh bawk.

An hmelma leh elpui Bar­celona hi Nou Camp-a an hmachhawn ṭumin Cristiano Ronaldo goal khung chu Catalan club hian Carles Puyol leh Eric Abidal hmangin an chhang let a, second leg-ah goal awm loa an inhnehtawk avangin Barca 2-1 in an tlang.