Lewis Hamilton mi duhzawng Bottas

Mercedes team boss Toto Wolff chuan an driver thar Valtteri Bottas chu an driver hmanthiam sa Lewis Hamilton nen an inkawp rem a beisei thu a sawi a, Britain tlangval hian a car khalhpui tur chu a mi duhzawng a nih thu a sawi bawk.

Season hmasa khan Mercedes hian Formula 1 inelna an thunun hneh hle a, season tawpah Nico Rosberg chuan champion nomawi a chawi. German driver hian world champion a nih hnu lawkah F1 inelna a chawlhsan thu a puang a, karhmasa khan a hmun ruak luah turin Bottas an lalut.

Wolff chuan, "Nikum kum tawp lam khan Lewis nen inbiakna kan nei tawh a, ani chuan Valtteri chu pa ṭha tak a nih thu leh inelna hmachhawn pui tura thlanawm berte zinga mi a nih thu a sawi. Kan driver te pahnih hian season tharah chuan inkawp rem takin car an khalh dun ka beisei," tiin a sawi.

Mercedes hian world champion ni tawh pahnih - Sebastian Vettel leh Fernando Alonso te an duh nia sawi a nih laiin nomawi la chawi lo Bottas chu kum khat chhung atan contract an ziahpui hian sawi zui a hlawh.

Wolff chuan sawi chhunzawmin, "Duh leh beisei angin thil a thleng thei vek lo. Bottas chungah rinna kan nghat ngam a, ani kan lalut hian mimal aiin team inpumkhatnaah kan innghat zawk tih a lantir," tiin a sawi.