Zaninah Super Fight League 2017

Super Fight League (SFL) chuan kumin aṭangin kalphung thar an duang a, team pariatah fighter 96 te chu ṭhendarh niin inelna hi league-a kalpui tur a ni. Zanin dar 6:00 hian opening ceremony neih a ni ang a, darkar khat hnuah Delhi leh Haryana ten match hmasa ber an khel ang - inelna hi Sony Espn HD-ah a en theih ang.

SFL hi khawvela Mixed Martial Arts (MMA) league hmanga kalpui awmchhun a ni a, inel tur team pariatte chu Delhi Heroes, Mumbai Maniacs, Gujarat Warriors, Sher-e-Punjab, Bengaluru Yoddha, UP Nawabs, Haryana Sultans leh Goa Pirates te an ni.

India ram fighter baka foreign fighter ṭha inelna tur SFL-ah hian Dawrpui tlangval Samuel Lalrozama chu head referee tur a ni a. Mizo pathum dang Andrew Zonunsanga (Dawrpui), Lalchhuanmawia Hnamte (Dawrpui Vengthar) leh Lalṭhakima (Venghlui) te chu event parukah judge an ni bawk ang.

Durtlang tlangval C. Lalduh­awma chu league fighter zingah telin Bengaluru Yoddha-ah ziahluh a ni a, Dawrpui Vengthar tlangval Vanlalchhuanga chuan opening ceremony-ah amateur bout a khel dawn bawk. Anni pahnih bakah hian MISMA MMA fighter Zorinmawia (Luangmual), Zorammawia (Zarkawt), Ngurlianzuala Sailo (Lily Veng), Lalvenhimi (Khawhai) leh Jacinta C. Zomuanpuii (Edenthar) te chu back up fighter-ah an awm bawk.