MBBA season a tawp fel

Mizoram Basketball Association (MBBA) chuan 2020 season kal lai chu an ti tawp fel tih an puang a, inelna lian ber Mizoram Super League (MSL) erawh khelh zawh hram dan an la ngaihtuah.

MSL board aṭanga Vanglaini thudawn dan chuan a hmuna entu awm loin khelh an tum a, semifinal, final leh relegation playoff chu season thar lo awm tur nena inzawm a nih avangin khelh hram a ngai - sorkar thuneitu lamin an phalsak chuan khelh a ni ang.

March thla laihawl thleng khan MSL6 league round khelh a ni, league match hnuhnung ber chu March 17 khan Khatla TBL leh Ramhlun Basketball Club ten an khel, mahse sorkar thurawn angin relegation playoff leh semifinal chin erawh an khel ta rih lo.

All Star Game chu ṭhulh fel a ni a, league round hnuhnung lam hi a hmuna entu awm loin khelh a ni bawk. League khelh chhunzawm hi thuneitu lamin duh mah se sorkar thutlukna an ngaihchan a ngai.

Club paruk inel zingah Zarkawt BCA chuan match nga an khelh tawhah hnehna chang vekin, champion lai hi table hmahruaitu an ni. BCA bakah hian Chanmari Vikings, Khatla TBL leh Tuikual South-te chuan semifinal an 

lut bawk.

Mizoram Super League ni lo inelna dang erawh Covid-19 vangin khelh zui theih a ni dawn lo. State pum huap bakah district hrang hrang tan pawh season a tawp nghal - tualchhung baksetball inelna chu season tharah chauh a awm tawh dawn tihna a ni.

MBBA executive committee chuan August 7 hian Special General Assemby chu online hmanga kalpui a tum a, hetah hian season thara an kal dan tur sawiho a ni ang. District aṭanga thu thehluh duh nei tan July 16, Ningani hma lama thehluh tur a ni ang.