Kashyap-a lakah Aizawl FC fimkhur a ṭul

Aizawl FC-in Pathianni zan dar 7:05 hian Cooperage Ground-ah Mumbai FC an hmachhawn dawn a, I League inkhel ngaihven hlawh ber ni lo mah se Mizo club tan chuan a pawimawh a ni. Inkhel hi Ten 2-ah a en theih ang.

Tu nge Kashyap?
Mumbai FC-in nikum June thla khan kum sarih chhung coach atana an chhawr tawh Khalid Jamil thlak nan Santosh Kashyap an la lut a, ani hi club tenau enkawl thiam bik a ni. Kum 50-a upa coach hian Air India a enkawl laiin budget nei tlem mah se a relegate pui bik lo a, Mohun Bagan-in beiseina sang tak nen an la lut a, 2012 Federation Cup-ah a chet ṭhat pui loh avangin I League match hnih zawhah ban a ni.

Kashyap hian ONGC leh Rangdajied United te enkawlin inchhuanna tham result a neih pui lo a, Royal Wahingdoh-ah erawh a hming chher hle. 2014-15 I League-ah Shillong club hi pathumna an ni a, Kashyap hian fak a hlawh. Season liam ta khan tla thei dinhmuna ding Salgaocar chu a chhanhim bawk a, amaherawhchu Goan club hian I League an khel zui duh lo.

Engtin zel?
Nikum April 11 khan Kashyap-a enkawl Salgaocar hian RG Stadium-ah Aizawl FC chu 1-0 in an hneh a, chak tura rinkai zawk MPL club an mualpho. Inkhelh hma hian Kashyap hian, "Kan relegate lo ang," tiin Vanglaini palai a hrilh a, a thusawi tidik turin game plan a siam bawk.

Mumbai FC coach Kashyap hi defen­sive game khel ṭhin tho a ni a, tun season-ah pawh foreigner nei lo chungin match hmasa pahniha point ruk an hmuh theihna chhan a ni. Amaherawhchu match hnuhnung berah Bengaluru FC 3-0 in an hneh lo a, defender pawimawh Lalchhawnkima a inhliam bawk avangin tlarhnung rem phui a awl dawn bik lo. Chutihrualin Mumbaikars-in FIFA World Cup khel tawh Densill Theobald an la lut a, ani hi Royal Wahingdoh-a Kashyap-a hman thiam a ni.

Khalid-a mualah
Aizawl FC coach Khalid Jamil-a'n Cooperage Ground a hrechiang a, thli thawt dan mila attack dan thlengin a thiam tiin sawi a ni ṭhin a, hei hi Mizo club tan a pawimawh ang.

Kum 39-a upa Khalid chuan, "Mumbai FC khelmual hi ka hrechiang a, ka in ang maia ka tlangnelna hmun a ni. Tunah erawh Aizawl FC coach ka ni tawh a, kan chak theih nan theihtawp ka chhuah ang," tiin chak tuma an khelh tur thu a sawi.

Shillong Lajong lama chakna goal khungtu Jayesh Rane leh Ashutosh Mehta ten an club hlui an hmachhawn dawn a, season liam ta khan Cooperage Ground-ah AFC leh Mumbai FC te 2-2 in an inhnehtawk.