Rafael Nadal a chak nuamsa

Australian Open seeded pa­kuana leh kum 2009 champion ni bawk Rafael Nadal chuan 2006 finalist Marcos Baghdatis lakah attacking game hmuhnawm hmanga hnehna changin third round a lut.

Ningani zan Rod Laver Arena-a inkhelah Grand Slam vawi 14 champion tawh Nadal hian darkar hnih leh minute 13 chhungin 6-3, 6-1, 6-3 in hnehna a chang. Spain tlangval hian set hmasa berah 5-1 in hma a hruai fal thei a, set hnihnaah pawh game hmasa pali a la zawn thei bawkin second round paltlang turin harsatna a nei lo.

Nikum Australian Open-ah khan Nadal hi first round-ah a tla a, Melbourne-a a record chhiat ber ṭum a ni hial. Ban rek na vanga Wimbledon a khelh loh bakah French Open aṭangin a inhukdawk bawk - season hmasa Grand Slam-a a thlen thu ber chu US Open last 16 a ni.

Kum 30-a upa Nadal chuan, "Hliam nei ṭhin mah ila chhuan­lam siam a ṭul lo. Hun harsa tawk ve bawk mah ila tennis ka khelh hun chhungin hlawhtlinna ka chang nual tawh a, theihnghilh tawh loh tur sulhnu ka neih nual tawh avangin inkhel apiang hi huam ti taka khelh zel ka duh," tiin a sawi. Nadal hi nikum October thla hnuah a la inkhel tam lo hle, January thlatir khan Brisbane International-ah inlanin quarterfinal a lut.

Murray kal zel

Nimin khan world number 1 Andy Murray chuan Sam Querrey 6-4, 6-2, 6-4 a hnehin third round a paltlang. Britain fa chuam hian Germany tlangval Mischa Zverev a hmachhawn leh ang.

Kum 29-a upa Murray hian Australian Open final vawi nga a khel tawh a, Novak Djokovic hneh loin pahnihna a ni vek. Kuminah Serbian thiampuipa Djokovic chu rin loh takin second round-ah a tlak tak a vangin Murray tan nomawi beiseina a san phah hle.

Murray chuan, "Ka khel ṭha tual tual a, beiseina pawh a sang zel e. Inkhel ṭantir lamah khan Querrey khan min nawr na hle a, chutihrualin buaina lian tham ka tawk lo," a ti.

Inkhel dangah US Open champion lai Stan Wawrinka chuan inkhel hautak leh hmuhnawm takah Viktor Troicki chu 3-6, 6-2, 6-2, 7-6 (9-7) a hnehin last 16 a inhlangkai ve bawk.

Grand Slam vawi thum champion tawh Wawrinka hian Andreas Seppi a bitum leh ang, Swiss star hi a chak chho zel a nih chuan semifinal-ah Murray nen an inhmachhawn thei dawn a ni.