Pep buaina belhchhah theitu Poch Man City Vs Spurs

Premeir League-a ṭan bik club nei lo tan chuan Manchester City-in an mual Etihad Stadium-a Tottenham Hotspurs an mikhual tur aia hmuh châkawm hi a awm chuang lo - men rei zan kan thleng leh ta.

Zanin dar 11:00 hi inkhelh hun chu a ni a, Argentine manager Mauricio Pochettino hote hi Spanish manager Pep Guardiola-a'n Manchester City a enkawl hnua a hneh loh hmasak ber an ni. Nikum October 2 khan White Hart Lane-ah Spurs hian City hi 2-0 in an hneh a, thilmak a tling. Thla thum a ral leh meuh chuan, Poch-a hote hi rinkai zawk an ni tawh!

Poch hriam zawk

Tottenham Hotspurs-in season liam taa an hmelma Arsenal chunga an awm theih loh avangin dem an hlawh a, amaeherawhchu an tlu hlen lo - tun season-ah team ṭha zawk an ni. Argentine manager Poch hian a player duh tak Victor Wanyama a la lut a, squad an neih chhah vanga an ṭhatna piah lamah manager berin hma a sawn tlat.

Chelsea manager Antonio Conte-a'n tlarhnunga centre back pathum Premier League-a a hlawhtlinpui avangin fak a phu a, amaherawhchu Italian manager hian a coaching career tam zawkah defender lai pathum a hmang. Spurs manager Pochettino erawhin English football-ah Southampton a enkawl laiin January 2013 khan defender lai pathum chu vawi khat a hmang tawh a, tun season ṭantirhin centre back pathum a hman ring an awm kher lo ang.

Tunah erawh Poch hian tlarhnunga player pathum emaw pali emaw pawh rem se buaina a nei lo a, tlarhnung a phui ṭhat ang bawkin goal khung kawngah harsatna a nei lo. Manchester United keeper David de Gea leh Chelsea keeper Thibaut Courtois te hming langsar mah se tun season-ah keeper ṭha pahnih aiin Spurs keeper Hugo Lloris-a'n shots-saved percentage a nei ṭha zawk.

Tlarhmaah goal 13 khung tawh Harry Kane an nei a, Dele Alli-a'n goal 10 a khung tawh bawk. Kane leh Alli te ṭhatna lang chhuak turin Christian Eriksen a la awm bawk a, inelna hrang hranga vawi sarih chak zawn tawh Spurs hmachhawn hi a châkawm loh.

Tho leh tur Pep?

Pep Guardiola hi a inkhelh hun laiin player naran chunglam a ni a, nomawi duha tuihal a ni. Manager a nih hnuah pawh a record thlirin 'coach ṭha bik' te zinga mi a ni a, chetfuh loh ṭum nei ve mah se tlu hlen turin a dawihzep lo.

Everton laka 4-0 ngawta mualpho City tan thawhchhuah a har dawn a, amaherawhchu hei tak hi Spanish manager Pep-a fiahna hun chu a ni. Bayern Munich manager hlui hian Barcelona a enkawl lai angin a duh anga khel thei tur player a nei lo tih chu chiang a, Toffees an hneh loh ṭumin wing back Pablo Zabaleta pawh midfield-ah a chhawr hial. Spurs an hmachhawn hunah hrem vangin Fernandinho a la khel thei dawn lo a, Fernando dinhmun a chiang lo a, tun season-ah Ilkay Gundogan a inlan tawh dawn lo bawk.

Amaherawhchu City tana thu lawmawm chu Gabriel Jesus-a'n training a zawm tawh a, Brazilian striker hian 2016 Olympic-ah khan an ram chu gold medal a lakpui bakah Campeonato Brasileiro Serie A-ah Palmeiras a champion pui bawk. Hetiang player ṭha bik tan hi chuan khawi club-ah pawh hmunruak a awm a, City-ah pawh Sergio Aguero ṭhatna belhchhah theitu leh mawhphurhna lak kian sak theitu a ni ngei ang.

City hian Kevin De Bruyne, Raheem Sterling, David Silva, Yaya Toure leh player ṭha tak tak an kawl a, heng zinga pakhat pawh hian khel ṭha se Spurs tan chuan buaina tham a tling tho. Tottenham lamin an defender pawimawh Jan Vertonghen kar ruk chhung an chhawr thei bik dawn lo a, City hi tlachhe viau anga ngaih ni mah se Spurs an hneh chuan Poch-a hote hi Pep-a naute nen an point hmuhzat a inang dawn. Result nghawng a lian a, inkhel pawimawh takah player kim lo mah se player ṭha rual an la inrem ṭhup dawn avangin a hmuhnawm khawp ang.

Spurs faktu Pep

Manchester City manager Pep Guardiola chuan, "White Hart Lane-a Tottenham kan hneh loh ṭum khan keini aiin an ṭha zawk a, ani chiah hi kan tluk loh chu an ni. Amaherawhchu football-ah chuan goal hi a pawimawh ber a ni," tiin Everton lakah chak lo chiang mah se team ṭha zawkah a inngai tho.

Spanish manager Pep chuan, "Ka awmna ngai loh hmunah ka awm mek a, kum sarih chhung kha chuan a chunglamah ka awm ṭhin. Hun harsa aṭanga tal chhuak turin thawhrim a ngai a, Tottenham hneh thei turin kar khat inpuahchahna hun ṭha kan nei," tiin an awmna mek pathumnaah a lungawi loh thu a sawi.

Zanin Inkhel Tur
Liverpool 6:00 PM Swansea City
AFC Bournemouth 8:30 PM Watford
Crystal Palace 8:30 PM Everton
Middlesbrough 8:30 PM West Ham United
Stoke City 8:30 PM Manchester United
West Brom 8:30 PM Sunderland
Manchester City 11:00 PM Tottenham Hotspur
January 22, Pathianni
Southampton 5:30 PM Leicester City
Arsenal 7:45 PM Burnley
Chelsea 10:00 PM Hull City