Khelh chhan tur kan la ngah - Carrick

Manchester United midfielder Michael Carrick chuan inelna palia an la tel vek thei chu lawmawm a ti a, Inrinni zana Stoke City an tlawh hunah match 17 chhung hneh loh nei loa an kaltluang tawh chu chhunzawm zel an tum thu a sawi tel bawk.

Kum 35-a upa Carrick chuan, "Tun ang huna inelnaa kan telna zawng zawnga champion theih aia ṭha a awm chuang lo. Kan khelh tam vangin kan phun nawi lo a, season tawp ṭha taka khar turin theitawp kan chhuah a ṭul zawk a ni," tiin an la phur thu a sawi.

United midfielder Carrick chuan, "Liverpool kan khelhpui ṭuma kan phurna ang tho khan Stoke City nena kan inkhel tur hi kan ngaih pawimawh a ṭul a, kan chunga awm te nena kan inthlauhna hi a la tam lo," tiin champion tura beiseina an neih thu a sawi.

Stoke City manager Mark Hughes chuan Manchester United-in manager Jose Mourinho hnuaiah an ṭhat ber hun an hmachhawn thu leh chak zawk tura rinkai an nih thu a sawi rualin a club hlui hmachhawn tura a inpeih thu sawi tel bawk.