Naktukah Mizoram vs ARC, Bangalore

31st Captain NM Gupta Trophy Football Tournament chu vawiin hian Silchar-ah khelh ṭan a ni dawn a, Mizo­ram team chuan naktuk chawhnu dar 2:30 hian Army Recruitment Corps Centre, Bangalore chu an game hmasa berah an hmachhawn ang.

Mizoram team hi Santosh Trophy final round khel tura inpuahchah mek an ni a, nimin zing khan Silchar panin an chhuak a, naktuk chawhnu lamah Satindra Mohan Dev Stadium, Silchar-ah an inkhel ṭan dawn a ni.

February 4-a zawh tur inel­naah hian team 10 an tel dawn a, Mizoram hi Group B-ah awmin he group-ah hian ASC Centre (Bangalore), Arunachal SS (Silchar), Assam Regimental Centre (Shillong) leh Assam Rifles (Shillong) nen an awm khawm dawn a ni.

Mizoram khingpui tur Banga­lore lam team hi sipai an ni a, India rama sipai footballer ṭha tak tak an awm khawm a ni. Hei bakah hian Mizoram group lama awm team dang zawng pawh hi sipai team vek an ni a, ARC, Shillong hi chu englai pawha player nei ṭha an ni a, Assam Rifles (Shillong) hi nikuma Lammuala MPL-a hmahruaitu nilai Bethlehem Vengthlang FC hnehtute kha an ni.