Team inhlau lo East Bengal vs Bengaluru
Pathianni tlai dar 4:30-ah champion rinkai East Bengal leh Bengaluru an inhmachhawn dawn a, team pahnihin an inhlauh loh thu an sawi ve ve! I League-ah club 10 chiah an inel avangin match a tam lo a, team pahnihin champion an tum avangin he inkhela chak lo zawk nih hi 'point ruk' hlohna tluka chhiar theih a ni.
Bengaluru FC-in an match hmasa pathum an khelmuala an khelh vek avangin an vannei a, hneh loh an tawng lo - khualmuala an inlan hmasak ber tura East Bengal lenchilh nghal ngawt erawh an ṭawngṭai chhanna a ni bik lo tawp ang. East Bengal-in an match hmasa bera Aizawl FC an inhnehtawkpui hnuah an insiamṭha tawh a, Mizo tlangval Lalrindika Ralte captain-na hnuaia an match hnuhnung pahnihah hnehna an chang ve ve.
Hlauthawng lo Sena
Bengaluru FC-in an match hnuhnung berah Mumbai FC 3-0 in an sawp a, he inkhelah hian Mizo inlan an awm lo. Nimin khan Bengaluru hian Kolkata khawpui an pan a, East Bengal hmachhawn tura zin chhuak zingah Sena Ralte, Daniel Lalhlimpuia leh Malsawmzuala te an tel.
Mumbai an hmachhawn
ṭuma squad-ah pawh awm lo Sena chuan, "Mumbai kan mikhual ṭum khan coach-in East Bengal hmachhawn tura hahchawl turin min hrilh a ni," a ti a, Pathianni tlaia Kolkata club hmachhawn turin harsatna a nei lo.
North Mualcheng tlangval chuan an inkhel tur thlirlawkin, "East Bengal, Mohun Bagan leh Bengaluru hi champion tura rinkai kan ni a, team ṭha bik kan ni. Kan pathum inkhel kuala dingchang ber hian nomawi kan chawi ka ring a, chuvang chuan East Bengal nena kan inkhel tur hi a pawimawh takzet. Inkhel harsa tak a ni dawn tih ka chiang a, amaherawhchu point thum hmuh ngei tumin kan khel ang," tiin an hlauhthawn loh thu Vanglaini palai a hrilh.
Didika ala thiam reng
Indian football-ah hliam vanga rei tak a hming kan lam tawh loh hnuah Lalrindika Ralte a lo kir leh tawh a, East Bengal captain hian match hnih a khelh tawhah goal khat khungin assist pakhat a nei leh der tawh! Lunglei tlangval chuan, "Aizawl FC kan draw ṭum kha chuan player thar awmkhawm kan nih avangin team kan la in man tawk lo a, tunah erawh kan khelh dan kan chiang tawh tih kan match hnuhnung pahnihah kan pholang a ni," tiin team ṭha tak an nih tawh thu Vanglaini palai a hrilh.
Didika chuan sawi chhunzawmin, "Bengaluru hi an player tam zawk hi season rei tak lo khel ho tawh an ni a, an in man em em. Team ṭha an nihzia chu tun hnai an result-ah hmuh turin a awm a, chutihrual erawh chuan huphurhna ka nei miah lo. Team ṭha tak ve tho kan ni a, kan khelmuala inlan tur kan nih bawk avangin point thum hlawhchhuah hi chu kan tih ngei ngei tur a ni," tiin Vanglaini palai a hrilh a, Bangalore club lakah hnehna chan ngei an tum.
East Bengal tan hliam damkawr Robert Lalthlamuana'n training zawm ve leh tawh mah se inkhel bul ṭan tura a luh a beiseiawm loh a, David Lalrinmuana chu a unaupa dam lohna avanga Aizawl lamah a rawn haw chhoh avangin Bengaluru hmachhawn turin a inlan thei lo ang.