Philippe Coutinho vangin Klopp a hlim

Liverpool coach Jurgen Klopp chuan, tun hnaia a player pawimawh Philippe Coutinho lo kir leh avangin a hlim thu a sawi.

Brazilian midfielder hian November thla khan a kerekah hliam a tuar a, Reds-in Ningani zana Plymouth Argyle an hnehna inkhelah a hliam hnua a vawi khat nan inkhel bul a ṭan.

Klopp chuan, "Kan team-a Coutinho lo kir leh ta hian min ti hlim takzet a, ka phur takzet a ni. Mahse, Plymouth kan hmachhawn ṭum kha chuan 60-65 minutes vel bak a la khel thei loah ka ngai a, amah leh team tan kan dim hi a pawimawh a ni," tiin a sawi.

Hetihlai hian Plymouth laka Reds tana kum sarih hnua a goal hmasa ber khungtu Lucas Leiva chuan Anfield-a a dinhmun a sawi chiang duh lo.

Lucas chuan, "Tun din­hmunah chuan Liverpool-ah hian ka hlim a, he tih rual hian hmun hrang hrang aṭangin sawmna ka hmu ve reng bawk. Liverpool hi ka hmangaih a, chutih rual chuan hun tam ka neih tawh loh avangin ka hmalam hun ka ngaihtuah ve a ṭul bawk a ni," tiin a sawi.