India-in ODI series an la Yuvraj Singh a vul leh ta
Ningani khan India chuan run 15-in England an hneh a, ODI series match thum khelh turah vawi hnih hnehna chang tawhin series an la chiang tawh. ODI match hnuhnung ber hi January 26-ah khelh leh a ni ang.
Kum thum aia tam India tana ODI khel tawh lo Yuvraj Singh-a'n a thiam a la theihnghilh lo tih pholangin dinhmun hlauhawma India an din laiin a chhanhim a, ball 127 lek a hmachhawnah run 150 siamin hnehna a chanpui.
India = Yuvraj & Dhoni
Cuttack khawpuia inkhelah India an bat hmasa zawk a, opener Lokesh Rahul leh Shikhar Dhawan te hma taka an out hnuah captain Virat Kohli chu run riat lek siama a out leh bawk si avangin India dinhmun a derthawng hman hle - Blues (India sawina) hian run 25 an siam tihin wicket thum an hloh der tawh!
Mahse, Yuvraj Singh (150) leh MS Dhoni (134) te an lo ding chhuak a, an pahniha an din chhunga run an siam zat chu 256 a tling hman. Player pahnih chet ṭhat zarah tlawm tur anga lang hman India hian over 50-ah run 381 an siam a, wicket ruk chiah an hloh.
Team huaisen England
England tan India rama mualneitu laka run 382 vuak chhuah chu thil huphurhawm tak a ni. Mahse, England-in awlsam taka tlawm an tum bik lo tihlantir nan theihtawp chhuahin bul an ṭan a, ball 73 a hmachhawna run 82 siamtu opener Jason Roy chuan bul a rawn ṭan ṭha nghal hle.
Jason Roy dinpui Alex Hales chun run 14 lek a siam tihin out nghal mah se Joe Root chuan run 54 siam chungin Roy a rawn thlawp ṭha viau a, captain Eoin Morgan chuan century siamin run 102 tehmeuh a vaw chhuak bawk. Mahse, England tan Moeen Ali chuan half century rawn vaw chhuak ve leh bawk mah sela Yuvraj leh Dhoni anga che ṭha fal sawi tur an awm lo a, run 366 siama wicket riat hlohin a tlawm zawkah an ṭang ta a ni.
Singh is King
Kum 2013 tawp lamah ODI squad aṭangin Yuvraj Singh paih a ni a, hetih hunlaia a average chu 19.71 runs chiah a ni. India squad-ah Yuvraj kohkir lawk a ni lo a, nikumah ramchhung inelna Ranji Trophy lamah a chet ṭhat avangin England nena ODI series khelh turah hian kohkir a ni.
England lamin Yuvraj Singh-a chak lohna hriain fing takin 'short ball' hman tum mah se Punjabi tlangval hian hunrei tak hnua India tana a hun ṭha neih hi khawhral a duh lo a, England 'game plan' chu engmah lo maiah a chantir - England laka run 150 aia tam siam thei batsman paruk zingah a tel ta.
Man of the match-a thlan zui Yuvraj Singh chuan, "Ram chhung inelnaah ka khel ṭha a, ka fitness tih ṭhat nan theihtawp ka chhuah bawk. Vawiinah hian ka thawhrim rah chu ka tel a ni. Kum 30 pelh tawh chuan fitness ngaih pawimawh a ṭul a, chu chu mi ropui Sachin Tendulkar leh Anil Kumble te aṭanga ka zir a ni," a ti.
Chul thei lo Dhoni
Dhoni-a'n ODI series ṭan a nih hmain India captain a nihna aṭanga a ban thu a tichiang a, kum 35-a upa wicketkeeper-batsman hian khelmual chhunga hruaitu ṭha a nihzia erawh a pholang nawn. A kum rualpui Yuvi nen pressure sang tak hnuaiah hahdam takin an khel a, a tawpah India chu hmun himah an hlangkai.
Jharkhand tlangval hian ball a hmachhawn hnuhnung 20-ah run 41 zet a siam a, India-in an over hnuhnung 20-a run 214 an siam theih nan a thawh hlawk hle. Yuvraj Singh chuan, "Dhoni nen khan a tirah kan dinhmun a ṭha lo tih kan hriat avangin fimkhur takin kan khel a, risk kan la ngam lo. Hun ṭha kan neih chhunah erawh chesual duh loin theihtawp kan chhuah a ni," tiin a sawi a, boruak sanga chet dan thiam Dhoni a fak.