Solskjaer-a'n Pogba cham turin a duh

Manchester United manager Ole Gunnar Solskjaer chuan Paul Pogba chu Old Trafford-a hun rei zawk cham turin a duh. 

Covid-19 hma khan Pogba hi United chhuahsan tura sawi a ni a, kum 27 mi hi a club hlui Juventus leh Real Madrid te nen an sawi zawm. Amaherawhchu inelna ṭan leh hnuah Pogba hi Bruno Fernandes nen an inkawp rem chho a, Solskjaer hoten Champions League khelh an beisei tak avangin French midfielder hi a cham a rinawm tak zawk.

United boss Solskjaer chuan, "Kan club-ah hian player ṭha ber awm turin kan duh. Paul Pogba hian hma a sawn zel a, nuam tiin a inkhel chho a, cham rih turin kan duh a ni," tiin a sawi. Pogba contract hi thla 12 hnuah a tawp dawn a, United hian season khat dang pawhsei theih dan an nei bawk. Solskjaer chuan Nemanja Matic leh Scott McTominay te contract an pawtsei hnuah hun rei zawk Pogba chelh turin hma a la mek.

United hi Borussia Dortmund winger Jadon Sancho nen pawh sawi zawm an ni a, amaherawhchu German club hian English winger manah hian dollar maktaduai 100 chuang an phut. Solskjaer chuan, "Covid-19 vangin khawvel a danglam a, kan thil thlir dan leh thil hlut zawng thlengin a danglam. 

"Club executive vice chairman Ed Woodward hmaa ka duh zawng ka chhawp reng rengin thil thlen tur ka sawi ṭhin. Hun rei lote atan thlir loin hun rei zawk atan ka thlir ṭhin. Sum chungchang chuan ka fimkhur hle," tiin a sawi a, Sancho man zat chu to hretah a ngai niin a ngaih theih.