Payet hmalam chiang thei lo
West Ham tan Dimitri Payet a inlan duh tawh lo a, London club hian France club Marseille dawrna ṭum hnih an hnawl ta bawk. Hammers hian French midfielder hi a man phu tawk dilna an hmuh loh chuan chhuah an tum lo a, Payet hmalam a chiang thei lo.
Payet a hlu!
June 2015 khan West Ham chuan France international midfielder Dimitri Payet chu pound maktaduai 10.7 in an la lut a, Hammers co-chairman David Sullivan chuan, "World class player kan la lut a, kum 22-a upa chu la ni se pound maktaduai 30 chuang man a ni ang. Chutihrualin tun hi a ṭhat lai ber hun a ni," tiin a inchhuang hle.
Payet hian fak a dawl a, khelmual chhungah a thiamna a lantir avangin Hammers ṭantuten an ngaina a, Euro 2016-ah pawh France rinrawl ni phak a ni. West Ham supporter chuan, "Payet kan nei a, inhriatthiam baka hlu a ni. Coach ropui Slaven Bilic-a hmanraw pawimawh a ni a, Zidane ai pawhin a ṭha," tiin French midfielder pual hian hla an phuah sak.
Amaherawhchu Payet hian harsatna a nei a, Hammers tan a inlan duh tawh lo. Marseille lamah French midfielder hian kal a duh a, Ligue 1 club pawhin laklet ngei tumin an dawr vawi hnihnaah an dawrna hmasa zawk pound maktaduai 19 aiin pound maktaduai khatin an ti tam a, an la hlawhtling lo. Kum 29-a upa midfielder hi West Ham tan a hlu tih a chiang hle.
Payet-a buaina
Kum 2011 khan Payet hi Saint-Etienne tan a khel a, Paris St Germain-ah kal a duh avangin lungawi lohna a lantir a, reserve team tan khelin pawisa chawi bawk mah se a duh a hlawhlting lo.
Thla 18 liam ta erawh kha chuan Marseille chhuahsan a duh lo a, amaherawhchu French club hian sum an mamawh avangin an chhuah luihtir thung. Payet hi London-ah a inbengbel thei lo a, a nupui leh a chhungte pawhin nuam an ti lo. Tunah hian French midfielder nupui fanaute hi France-ah an let leh tawh a, school kalna tur an zawng leh mek.
Payet-a'n Marseille a let duh chhan hi sum vang a ni lo a, pawisa vang chu ni se China a pan ang. Amaherawhchu French midfielder hian a club hlui tana a khelh leh theih nan a hlawh tihhniam pawh pawi a ti lo a, chhungkua a ngaih pawimawh vang a ni.
Engtin zel?
Hammers striker hlui Dean Ashton chuan Payet-a chet dan hi a hrethiam lo a, English forward hian inhliam vangin loh theih loin football a chawlhsan.
Kum 33-a upa Ashton chuan, "Payet-a khawsak dan hian minti thinrim hle a ni. West Ham hian an hmangaih a, an ngaisang bawk. Naupang tam tak player ngaihsan ber a ni a, hetia a chhuah tawp hi an phal lo a ni," tiin a lungawi loh thu a sawi.
West Ham manager Slaven Bilic chuan, "Payet chhuak tur hi pumpelh theih a ni em tih ka hre lo. Engmah danglam a la awm lo. Dimi hi a dinna ngaiah a la ding a, keini pawh kan dinna ngaiah kan la ding. Club chairman kutah engkim ka dah a, amah duhtu Marseille kutah a awm," tiin buaina chingfel turin French club-in sum tam zawk an thehchhuah a ṭul tur thu a sawi.
Hammers hian Payet tel loin Crystal Palace 3-0 in an sawp a, zanin hian French midfielder tel loin Middlesbrough khelmualah an lenglut ang.