Arsenal striker Giroud a dam

Olivier Giroud chu Pathianni zan dar 7:45-a Burnley nen Premier League an khelh turah a inlan thei dawn. France international bakah hian hliam vanga an match hnuhnung bera inlan lo Hector Bellerin, Francis Coquelin leh Kieran Gibbs te chuan team trai­ning an zawm leh vek tawh.

Arsenal hian an league match hnuhnung berah Swansea City 4-0 in an sawp a, goal hmahruai khungtu Giroud chu a ke rek na vangin second half-ah lak chhuah a ngai. Kum 30-a upa Giroud hian a club tana a match hnuhung pangaah goal nga a khung thei a, Nilainia training a zawm leh thei kha Gunners fan-te tan chanchin lawmawm a tling.

Arsene Wenger chuan, "Bellerin, Coquelin leh Gibbs te chu inkhel turin an dam tawh a, hetihlai hian Theo Walcott erawh a la inkhel thei lo. Tlarhnung lamah kan player pawimawh Per-a'n contract a pawtsei hi kan lawm a, season pawimawh lai taka a rinawm zia a lantir hian min ti lawm hle - inkhel thei erawh a la ni rih lo," a ti.

Gunners defender Per Mertesacker chuan tun hnai khan season tawp ruala tawp zui ve mai tur a contract chu kum khat chhung atan a lo pawt sei ve bawk. Germany inter­national hi a hliam vangin tun season-ah a la inlan lo - team training zawm ve tawh mah se Burnley a la hmachhawn thei dawn lo.