Hun ṭha hmang ṭangkai lo West Ham an buai

West Ham United-in Nilaini zan khan Burnley an mikhual a, inkhel thunun zawk mah se goal an khung thei lo. Mikhual Clarets erawhin Jay Rodriguez hmangin minute 38-naah goal an khung a, 1-0 in hnehna an chang.

Hammers hian point 31 an hmu a, Premier League-ah 16-naah awm mek mah se relegation zone-a awm team nen an inthlauhna chu point li chauh a ni. Nizan khan relegation zone-a awm pahnih Aston Villa leh Bournemouth ten Manchester United leh Tottenham te an hmachhawn a, an chak a nih phei chuan an inthlauhna hi point khat chauh a ni tawh ang.

West Ham-in an mualah inkhel an thunun zawk a, goal shot pawh vawi 22 zet nei mah se goal zawnah vawi nga chauh an pet thei a. Burnley keeper Nick Pope an paltlang thei lo.

David Moyes hnuaia che ṭha tak Tomas Soucek-a'n Clarets lakah tun hnaia a chet ṭhat a chhunzawm thei lo. Czech midfielder hian dinglam aṭanga Ryan Fredericks cross chu nang fuh chiah mah se goal-ah a chantir thei lo a, keeper Pope-a'n a dansak. 

Mualneitu lamin chance ṭha an hlah laiin Burnley forward Jay Rodriguez-a'n vei lam aṭanga Charlie Taylor cross chu mawi deuhin a tauh goal a, minute 38-naa goal lut hi inkhela goal awmchhun a ni. Hammers tan Michail Antonio leh Andriy Yarmolenko ten chance ṭha an hlah a, pet goal lo ho ber erawh Sebastien Haller a ni a. Pound maktaduai 45 man Haller ke zawnah ball per a tla fuh a, amaherawhchu French forward hian a hmaa keeper Pope chauh awm tawh chu a paltlang thei lo.

Pope hian tun season-ah vawi 14 clean sheet a nei tawh a, Golden Glove dawng thei dinhmunah a ding mek. Mimal lawmman aia pawimawh erawh Pope hian Burnley hnehna a chanpui a, point thum avang hian season thara Europa League khelh an beisei theih phah bawk.

West Ham boss David Moyes chuan, "Kan hrilhhai hle tih hian kan dinhmun a sawifiah hle. Chance ṭhahnem tak kan hlah a, inkhel kan thunun chunga point kan hlawhchhuak lo kha a pawi takzet a ni. Chelsea nen ṭha takin kan khel a, kan phu ang result kan hmu. Newcastle leh Burnley hi kan chak theihna turah kan ngai a, mah se hun ṭha neih kan bawhpelh," tiin an vanduai thu a sawi.

Burnley boss Sean Dyche chuan, "Tun hnaia kan inkhelhah kan khel ṭha thei hle. Tun ṭumah pawh kan defender lai te an che ṭha a, keeper a khel ṭha takzet. Kan mamawh hun takah kan keeper a rawn lang ṭhin a, point thum hlu tak kan hlawh chhuak. Liverpool kan hmachhawn lehnghal dawn a, team chhia an nih loh avangin insiamṭhat thuai a ngai dawn a ni," tiin a sawi.