Vawiinah CYMA Cricket Final Chawhma dar 11:00-ah Ramhlun Venglai Vs Durtlang

Central YMA leh Cricket Association of Mizoram buatsaih 11th Inter Branch Cricket Tournament final chu Ramhlun Venglai leh Durtlang ten vawiin chawhma dar 11:00 hian Suaka Cricket Ground, Sihhmuiah an khel dawn.

Tualchhung cricket hrethiam pha chin chuan RVL leh Durtlang hi inelna ṭan hma hauha final tura an rinlawk an ni a, 'final duhthusam' tia sawi theih a ni.

Record ṭha ber!
CYMA Cricket hi kum 2003 aṭang khan neih ṭan a ni a, tun hi ṭum 11-na niin vawi 10 neih a ni tawh. Ramhlun Venglai hian inelna hmasa berah final an lut a, kum 2006 khan a vawi khat nan nomawi chawiin final-a an hneh chu Durtlang an ni.

RVL hian kum 2008-ah Chanmari hnehin champion leh mah se Chanmari lakah hian final-ah ṭum hnih a zawnin an tlawm. Tun hnaiah RVL hian harhtharna chang lehin inelna hnuhnung pahnihah an champion. CYMA Cricket-ah Ramhlun Venglai hi vawi li an champion tawh a, final-a an hmachhhawn tur Durtlang hi ṭum thum an hneh.

Tualchhung cricket-ah RVL-in record an nei ṭha a, vawi ruk final lutin vawi li ngawt champion mah se Chanmari nen an champion zat a inan avangin 'BER' tia chhal an la har. Ramhlun Venglai hian CYMA Cricket-a record nei ṭha ber ni turin Durtlang hi final-ah a ṭum li nan an hneh leh a ṭul.

Phuba chu
Cricket infiamnaa hming langsar K. Vanlalruata awmna Durtlang hian record nei ṭha bawk mah se Ramhlun Venglaiin an record ṭha lehzual tur an tihchhiatsak. Kum 2006 khan Durtlangin a vawi khat nan final an lut a, RVL an hneh lo.

Durtlang hian kum 2007-ah final an lut leh tho a, tun ṭum semifinal-a an hneh tak Chaltlang hnehin an champion. Hemi hnu lamah erawh Durtlang thawm a zawi a, kum kaw chhung final an luh loh hnuah kum 2016 leh 2018 khan final lut leh mah se RVL lakah an tlawm ve ve.

Veteran player Ruata chuan, "Ramhun Venglai chu team ṭha zawk an ni a, player pawh an nei ṭha zawk. Amaherawhchu tun ṭuma an player-te hi kum lama naupang ve tak tak an ni a, final-ah chuan boruak a danglam ṭhin. A khel ṭha zawk zawk an champion ang," tiin tu zawk zawk pawh an champion theih thu Vanglaini a hrilh.

Final chu
Ramhlun Venglai hi kim ṭhap se champion tura rinkai lawrlak an ni ang. Amaherawhchu bowler ṭha mi Remruatdika Ralte chu IPL club Rajasthan Royals-in net bowler turin an la a, all rounder pahnih Joseph Lalthankhuma leh K. Vanrotlinga ten National Cricket Academy-ah training an nei mek.

Chutihrualin RVL hian Mapuia Memorial Mizoram Cricket League-ah club an nei a, pathumna an nih phak bakah Mahuma Memorial leh President's Cup-ah te an champion. Central YMA Cricket-ah hian RVL club-a khel lo veng dang club-a khelte an awm bawk avangin RVL club-a khel pha pawh paih ṭhen an ngai a, hei hian squad ṭhatzia a pholang.

RVL captain Lalrintluanga Vanchhawng hi thluak hmang nasa a ni a, wicket la kher lo mah se run a pe tam ngai lo. Chutihrualin vice captain Lalrinfela Zadeng hi medium pacer a ni a, semifinal-ah wicket li lain man of the match-ah an thlang.

Batting lamah hming hmerha ṭha fal awm lo mah se Vanlalhruaitluanga, C. Vanlalhruaia, F. Vanlalmuanzuala bakah player dangte hi an khelh ṭhat nia team chakpui thei vek an ni. Coach Vanlalzuata chuan, "Team ang chuan kan ṭha zawk a, amaherawhchu Durtlang batter pali vel khi chu Mizoram ang pawha ber ni pha an ni. A bik takin Hruaizela hi tun dinhmuna Mizoram batter ṭha ber a ni a, an khelh ṭhat ni a nih chuan engpawh a thleng thei. Chutihrualin kan squad a ṭha a, kan chak theih kan beisei. Ruah a sur ang tih hi kan hlauh ber a ni," tiin Vanglaini a hrilh.

Durtlang leh Ramhlun Venglai te hi cricket academy nei hmasa an ni a, hemi a nih avang hian hming langsar lo pawh cricketer ṭha pangngai an kawl hnem. Tun ṭuma Durtlang top order Lalhruaizela, Zothanzuala, Lalhriatrenga leh K. Vanlalruata te hi an chet ṭhat ṭuma danglamna thlen thei vek an ni a, chutihrualin chesual ve thei tho an ni a, semifinal-a Chatlang an hneh ṭum pawhin an chesual.

Final-ah erawh player ṭha danglamna a lang ṭhin a, Durtlang pawhin hun pawimawhah an player ṭhate chungah beiseina sang tak an nei ang. Durtlang hi nomawi chawi ngei tumin an inpuahchah a, Ramhlun Venglai hneh châkin an tuihal. Final a nih tawh avangin inkhelhna hmun hi Sihhmui ni mah se Durtlang mipui an ṭhahnem tura ngaih a ni a, cricket ngainatna veng Ramhlun Venglai lam pawh an tlem bik hauh lo ang.

Ramhlun Venglai leh Durtlang te hi seeded team an ni a, last 16 aṭangin an khel ṭan. Final thleng tur hian match thum ve ve an khel tawh a ni.

Ramhlun Venglai: Last 16-ah RVL (113/8) hian Govt Complex (112/9) chu wicket hnihin an hneh a, wicket li latu. F. Lalruatfela chu man of the match-ah thlan a ni.
Quarterfinal-ah RVL (155/6) hian Zemabawk (61/10) an hmachhawn a, 94 runs-in an sawp. B. Laltlanmawia'n wicket li lain man of the match-ah an thlang.
Semifinal-ah RVL (150/7) hian Hunthar (64/10) chu 86 runs-in an sawp leh a, wicket li latu Lalrinfela Zadeng chu man of the match-ah an thlang.
Champion lai RVL hian final lut turin harsatna an tawk lo a, an bat hmasakin 150 runs an vaw tling ve ve. Inkhel pathumah man of the match atan bowler vek an thlang a, player hran vek an ni bawk.

Durtlang: Last 16-ah Durtlang (101/1) hian Ramhlun South (100/10) chu wicket kuain an hneh a, Lalhruaizela chu man of the match atan thlan niin 27 runs a siam bakah wicket hnih (14/2) a la.
Quarterfinal-ah Durtlang (79/1) hian Armed Veng (75/8) chu wicket kua bawkin an sawp a, 45 runs siamtu Zothanzuala chu man of the the match-ah an thlang. Match hmasa pahnihah awlsam takin Durtlang an chak.
Semifinal-ah Durtlang (107/7) hian Chaltlang (104/9) chu wicket thumin an hneh a, an chak hram. Man of the match-ah 25 runs siamtu Lalhruaizela chu thlan a ni. Durtlang hi match thum an khelh tawhah ṭhum vawrah vannei vekin vawm hmasak an thlang vek a, final-ah ṭhum vawrin nghawng lian tak a nei thei ang.