Hmabak nei Man City an inthuam ṭha

Manchester City-in Premier League nomawi humhim turin match thum khelh tur la awmah point sarih an hmuh a ṭul a, zanin dar 12:45 hian Molineux Stadium-ah Wolverhampton Wanderers an hmachhawn dawn. Tun season la zo lo mah se Pep Guardiola hote hi season thar atan an inthuam ṭha ṭan a, Erling Braut Haaland chu an be fel tawha sawi a ni.

Nomawi a chiang?
Man City hian Champions League semifinal-ah Real Madrid hneh lo mah se Premier League-ah an tho chhuak nghal a, Spanish manager leh a hote thu hmanga insawifiah loin khelmualah 'distinction'-ah an pass.

Pep-a hote hian tun hnaia harh-tharna chang Newcastle United chu 5-0 in an sawp a, goal nga an khung bakah ball possession pawh 72% zet an chang. City tan hian Raheem Sterling-a'n goal hnih a khung bakah Aymeric Laporte, Rodri leh Phil Foden ten goal khat ṭheuh an khung.

Magpies laka an khelh dan thlirin Man City hian champion nomawi an humhim ngei dawn niin a lang a, zanina an hmachhawn tur Wolves bakah an khelh leh tur West Ham leh Aston Villa te lakah point an hloh a rinawm loh.

Man City hi tun hnaia an khelh dan thlir chuan nomawi an chawi chiang a, amaherawhchu football-ah chuan engpawh a thleng thei. Hei tak hi Liverpool innghahna a ni a, Jurgen Klopp leh a hote innghahna hi a chau rau tawh hle.

Inkhel tur chu
Wolves hian an match hnuhnung berah Chelsea chu 2-2 in an chelh a, amaherawhchu Blues an hmachhawn hma hian Newcastle (1-0), Burnley (1-0) leh Brighton (3-0) te lakah an tlawm. Man City tan erawh Chelsea meuh chelh thei team an nih avangin fimkhur a ṭul dawn.

Blues lakah hian Barcelona academy chhuak Francisco Trincao leh Liverpool academy chhuak Conor Coady ten goal an khung a, Man City lakah defender Coady hian a zir chhuahna club tan a theihna zawng zawng a chhuah a rinawm. Amaherawhchu City meuh chelh tur chuan Coady leh a ṭhiante tan hna a harsa khawp ang.

Man City hi ṭha viau mah se hliam vangin an buai tih hriat tel a ṭha. Season hnuhnung match pathumah defender pathum Kyle Walker, John Stones leh Ruben Dias te an khel thei dawn tawh lo a, buaina tham a tling. Tlarhma lamah erawh squad a chhah ṭha tawk a, Riyad Mahrez leh Bernardo Silva te pawh kartawpa an hahdam hnuin bul an rawn ṭan a rinawm.

An inthuam ṭha
Man City-in out and out striker nei lo chungin Premier League an champion ngei a rinawm a, Champions League-ah semifinal an thleng pha bawk. Pep Guardiola leh a hote thlen chin hi sang viau mah se European champion an nih loh avangin transfer-ah an thawm a na nghal hle.

Season ṭantirh khan Man City hian Harry Kane lak an tum a, an la thei lo. Tun nipui bazarah erawh chetsual an tum tawh lo, Borussia Dortmund striker Erling Haaland chu an be fel tawh. English club hian thuchhuah la siam lo mah se Norwegian striker hi pound maktaduai 63-in an lalut dawn a, thuthang satliah a ni tawh lo.

Man City leh Haaland aiawh te hi an inbiakna a rei tawh a, Norwegian striker agent Mino Raiola nen pawh khan a thih hmain thui tak an sawi hman. Haaland lak hi Kane aia a awlsamna chu Norwegian striker hian 'release clause' a nei a, pound maktaduai 63 chauh a nih bawk avangin City tan player hmin chiah hna a awm.

Khawthlang media-te tarlan danin City hian Haaland a hlawh hi an pe tam uchuak dawn lo a, Kevin de Bruyne hlawh aiin a sang dawn lo. Belgian midfielder hian kar khatah £375,000 a hlawh mek.

Haaland hian Molde, Red Bull Salzburg leh Dortmund tan match 121-ah league-ah goal 92 a khung thei a, Champions League bikah goal 20 khung thei naupang ber a ni. Norwegian striker hi player ṭha chungchuang a nih avangin Pep-a tan hman a harsat a rinawm lo a, Man City-in game plan A leh B an nei thei tawh ang.