India camp-ah Ṭhazuala

India mipa national basketball team camp-a awm turin Mizoram leh Khatla TBL guard Vanlalṭhazuala chu thlan a ni a, Bungkawn tlangval hi H. Laldinsanga leh Lalrina Renthlei te hnung zuiin India aiawha khel thei dinhmunah a ding.

Ṭhazuala hi Mizo baller zinga talent nei ṭha leh hmuhnawm zinga mi a ni a, Hollow BBSP aṭanga hming chher chhoin Mizoram Super League club ṭha Khatla TBL-in an lalut.

Point leh shooting guard-ah Ṭhazuala hi a khel thei ve ve a, Mizoram aiawhin Sub junior 2012, Youth 2014, Junior 2019 leh Senior 2022-ah te a khel tawh. Nikum December thlaa Mizoramin Assam hneha NorthEast champion an nih ṭum khan Ṭhazuala hi player pawimawh a ni a, final round-ah pawh a khel ṭha zui zel.

Ṭhazuala chuan, "India camp-a tel tura thlan ka nih thu hi training zawhah MBBA hruaitu zinga mi Sir Puia'n min rawn hrilh a, mak ka ti hle. Mizo tihmingṭha turin theihtawp kan chhuah dawn. Tun hun ka thlen theih nana min puitu ka club khelhna Khatla TBL leh a neitu bakah coach min enkawl tawhtute chungah ka lawm hle," tiin Vanglaini hrilh.

Khatla TBL guard Ṭhazuala hian MZU-ah MSc (Mathematics) a zir mek a, Mizo baller ṭha ber zinga tel chungin zirna a hlamchhiah lo a ni.