Warriors tan match khat chauh a ngai ta

NBA Western Confe-rence final lut turin Golden State Warriors dinhmun a ṭha ta. Stephen Curry awmna GSW hian nimin zing khan Memphis Grizzlies 101-98 in an hneh a, best of seven series-ah 3-1 in hma an hruai - tlang turin match khat chak chauh an mamawh tawh.

Game 3-ah Memphis hi 142-112 teh meuhin an mualpho a nih kha. Nimin zing Chase Center, San Francisco-a inkhelah erawh chak zawk tura rinkai an ni hman, mahni basket venhim ṭhat loh vangin Warriors an buai hman hle.

Dinhmun ṭha loa an din laiin Curry bawk chu Golden State damna a ni. American point guard hian inkhel pumpuiah point 32 a nei a, a point neih zinga 18 hi quarter hnuhnung bera a neih niin, hun tawp dawnah an chak nan free throw a vawm lut bawk.

GSW hi Curry chauha innghat erawh an ni lo. Andrew Wiggins (17 points) bakah point 14 neitu player pahnih Klay Thompson leh Jordan Poole te an khel ṭha bawk, conference champion chauh ni loin NBA champion nih pawh an tum ngam ang.

Nimin zing Eastern Conference semifinal lamah Milwaukee Bucks chu Boston Celtics lakah 116-108 in an chak lo. Celtics tan Al Horford a langsar, playoff chiah match khata point a neih hnem ber ṭum a tawng a, point 30 a neih chu team chakpui nan a tawk.

Quarter thumna an khelh laiin Celtics hi point 11 zetin an hniam fal hman. Mahse, NBA champion Bucks lakah Jayson Tatum-a'n point 30 a neih bakah rebound vawi 13 a la; Giannis Antetokounmpo (34 points and 18 rebounds) khel ṭha mah se a team a chakpui zo lo.

NBA Playoff
Eastern Conference Semifinal
Game 1: Milwaukee Bucks 101 - 89 Boston Celtics
Game 2: Boston Celtics 109 - 86 Milwaukee Bucks
Game 3: Milwaukee Bucks 103 - 101 Boston Celtics
Game 4: Milwaukee Bucks 108 - 116 Boston Celtics
May 12, Ningani
Game 5: Boston Celtics 04:30 AM Milwaukee Bucks
(Series-ah 2-2 in an inhnehtawk mek)
Western Conference Semifinal
Game 1: Golden State Warriors 117 - 116 Memphis Grizzlies
Game 2: Memphis Grizzlies 106 - 101 Golden State Warriors
Game 3: Golden State Warriors 142 - 112 Memphis Grizzlies
Game 4: Golden State Warriors 101 - 98 Memphis Grizzlies
May 12, Ningani
Game 5: Memphis Grizzlies 07:00 AM Golden State Warriors
(Warriors hian series-ah 3-1 in hma an hruai mek)