Thla 15 hnuah Wawrinka a chak

Hliam vangin hun rei tak buai mah se Stan Wawrinka a beidawng duh lo a, tunah chuan chak ni hmel a hmu ve leh ta. Tun hnai kum khat leh thla thum hnua a vawi khat nan ATP Tour-ah hnehna a chang.

Grand Slam vawi thum champion tawh hi Italian Open-ah inlanin, a match hmasa berah Reilly Opelka chu 3-6, 7-5, 6-2 in a hneh. Set hmasa ber hloh mah se, a hnuhnung pahnihah huaisen takin a tho chhuak.

Kum 37 mi Wawrinka chuan, "Min ṭantute hi beidawng loa ka inkhelh theih chhan chu an ni. A nihna tak sawi chuan kum khat chung chak nei loa awm chuan rilru a hnual, hetih chhung hian inkhel tam lo mah ila ka inkhelh chhunah pawh result a ṭha lo.

"Tunah chuan ka taksa dinhmun pawh a ṭha tawh. Beiseina ka nei reng a, set hnihna ka lak hnu kha chuan a hnuhnung zawk atan ka inpeih tawh hle, inrintawkna sang tak nen ka khelh avangin ka chak niah ka ngai," a ti.

Dominic Thiem erawh a la che fuh thei lo. Thiem pawh hi banrek hliam vanga hun rei tak chawl tawh a ni a, a inkhelh thiamna clay court-ah lo kir leh tawh mah se Italian player Fabio Fognini lakah 6-4, 7-6(5) in a chak lo.

Austrian tlangval hian theihna a nei sang, player langsar karah pawh US Open champion thei a ni. Mahse, a hliam dam hnuah ngai a la awh leh thei lo, tun ṭumah pawh hian a tihsual vanga a khingpuiin point a hmuh hi 22 zet a tling.

Kum 28 mi Thiem chuan, "Ka khelh dan kha lawmna tur a awm lo, engkim mai kha a harsa em em vek. Mahse, Madrid Open ka khelh dan ai chuan hmasawnna chu a awm," a ti, tun thla tawpa khelh tur French Open atan beisei neih san a har ang.

May thlatir khan Madrid Open-ah a inlan, hemi ṭum pawh hian a match hmasa berah Andy Murray a hneh lo. Theihna nei sang tak ni mah se ngai awh leh tur chuan hun a mamawh, tun hma lam a phak leh dawn em, tih pawh hriat a ni tawh lo.