Chhinga Veng hnehtu TNT

Zothan Autoworks Pro Volleyball League-ah champion lai Chhinga Veng Spikers an che fuh thei lo. Spikers hi TNT lakah 22-25, 25-15, 25-23, 25-16 (3-2) in an chak lo a, tun season atan match hnih an khelh tawhah an tlawm ve ve.

Thawhṭanni zan R. Dengṭhuama Indoor Stadium, Mualpuia inkhelah, tualchhung player hlanga khel TNT hian set hmasa ber hloh mah se huaisen takin an thho chhuak. A vawi khat nan PVL kheltu Vanlalṭanchhana (Buanga) chu D3 Business Player of the Night atan thlan a ni.

6ft 2in a sang Buanga'n point 21 a thawk chhuak a, tihsual chu nei ve bawk mah se an chakna hnar a ni. TNT hian inelna hmasa nena chhutin PVL-ah a zawnin match riat chak ni hmel an hmu lo, tunah chuan he an record duhawm lo tak hi a thai bo.

Coach thar Lalhmangaihsanga Sailo hoin Muanna Veng club hi an phur thar a, thawhhona ṭha chu an chakna hnar pawimawh ber a ni. Ningani zanah Aizawl khawpui pawn team awmchhun Tuichangral nen an inhmachhawn leh ang.

Chhinga Veng tan Sujith Acharya chuan point 31 hmu mah se, a tihsual vangin point 21 ngawt an hloh. State pawn aṭanga an chah luh hi Durtlang North an hmachhawn ṭum ang bawkin hnehna chanpui nan a tawk zo lo.

A zawna vawi hnih an tlawm tak avangin Spikers hian insiamṭhat an mamawh takzet. May 16, Thawhṭanni zanah vawi hnih champion tawh Hunthar an hmachhawn leh ang, record nei ṭha ber hmachhawn hi thil awlsam a ni lo mai thei.

Zanin Inkhel Tur - Mipa
Durtlang North 08:00 PM Hunthar
May 12, Ningani
Tuichangral 08:00 PM TNT
May 9. Thawhṭan zan Result
TNT 3 -1 Chhinga Veng Spikers
(22-25, 25-15, 25-23, 25-16)
D3 Business Player of the Night: Vanlalṭanchhana, TNT