Chelsea neitu thar: Tute nge an nih?

Roman Abramovich hoa ropuina tam tak an tem hnuah Chelsea-in neitu thar an nei dawn ta a, Blues leitute hi pawl intelkhawm ni mah se Todd Boehly chu hming langsar ber a ni a, midang hriatchianna hun a la awm meuh lo.

Boehly leh a thawhpuite hian Blues lei nan pound maktaduai 4.25 an seng a, mahse, an sum sen aṭanga £2.5tld chu London club leina man ngawr ngawr a ni a, a bak £1.75tld chu club hmasawnna atan hman a ni ang.

Baseball club LA Dodgers neitu zinga mi Boehly bakah hian Clearlake Capital, US mi hausa Mark Walter leh Swiss sumdawng hausa Hansjoerg Wyss te chu a tel langsar an ni a, an duh chuan Chelsea neitute hian sum hman tur an ngah ang.

Anni bakah hian American PR executive Barbara Charone, British sumdawng Jonathan Goldstein leh British journalist Daniel Finkelstein te pawh an tel a, tuna a lan danah chuan anni erawh share ngah tak tur an ni lo - Blues hralhna hi Premier League leh UK sorkarin a pawm ve phawt a la ngai tih erawh theihnghilh loh a ṭha a, tun thla tawpah chuan an pawm hman beisei a ni.

Todd Boehly
Eldridge Industries neitu Boehly hi infiamna khawvelah a mikhual lo. Baseball World Series champion lai LA Dodgers-ah 20% share a nei a, US hmeichhe basketball team Los Angeles Sparks neitu zingah a tel bawk.

July 2021 khan Mark Walter nena ṭang rualin, NBA franchise Los Angeles Lakers-ah 27% share an lei bawk a, sports betting firm DraftKings neitu a ni a, esports company Cloud9 a nei bawk - a theuneu lo hle.

American sumdawng hausa hian Eldridge kaltlangin company hrang hrangah share a nei bawk a, food industry thlengin sumdawnna a kalpui. Boehly hian mimal hausakna £4.72tld a nei nia sawi a ni.

Chelsea neitu hmasa Roman Abramovich-a hausakna chu January thla khan £12tld bawr vel a ni a, mahse, Russia-in Ukraine an do chu nasa taka tuartu zinga mi niin a hausakna hi £5.62tld velah a tla thla tawh!

Clearlake Capital
Chelsea leitu zingah chuan Clearlake Capital chu share ngah ber tur an ni a, an share neih zat tur tak erawh puanzar a la ni lo. Jose E. Feliciano leh Behdad Eghbali enkawl company hian £58tld vel hlutna an nei.

California-a hmunpui nei equity firm hian sumdawnna hrang hrang 300 chuangah investment an nei a, mahse, heng zingah hian infiamna kaihhnawih a la awm ngai miah lo - tunah Chelsea neitu an ni ta.

Clearlake Capital hian software & technology, energy, food & consumer service industry lamah te sum an hmang nasa a, Chelsea-ah hian eng ang takin nge an inrawlh thuk dawn hriat a châkawm hle.

Company dintu Jose E. Feliciano hian £2.77tld vel a neia ngaih a ni a, company a dinpui Eghbali hian a neih ang zat vel tho a neia sawi a ni.

Mark Walter
Kum 62 mi Mark Walter hi global financial services firm Guggenheim Partners dintu leh chief executive officer a ni a, a company hian New York leh Chicago-ah hmunpui neiin, an hlut zawng hi £250tld a tling.

Walter hi Boehly nen an inkawp nasa hle - LA Dodgers leh LA Lakers-ah share a nei ve bawk a, kum 2012 khan Sports Business Journal chuan infiamna khawvela sumdawnna huanga mi thiltithei zual pariatnaah an thlang.

Infiamna pawn lamah chuan Beyond Meat leh online-a car sumdawnna kalpuitu Carvaana-ah share a nei bawk a, Florida-ah a nupui nen ramsa, ral mai hlauhthawnawm ho dahna hmun an nei bawk.

Walter-a mimal hausakna hi £2.50tld bawr vel nia ngaih a ni a, a duh chuan sum hman tur a nei.

Hansjoerg Wyss
Swiss mi hausa Hansjoerg Wyss hian £4tld mimal hausakna a nei nia sawi a ni a, medical bungrua lam siam ṭhin Synthes dintu niin a company hi 2012 khan Johnson & Johnson hnenah a hralh tawh.

Kum 86 mi Wyss hian biotech company Novocure leh Molecular Partners-ah share a nei a, midangte ṭanpui lamah nasa taka inhmang mi niin Forbes chuan, "Khawvela midangte tana luang chhuak leh in phal ber pawl a ni," tiin an sawi hial.

Businessweek-in an chhut danin 2004-2008 inkar khan midang ṭanpui nan dollar maktaduai 277 chu a pe chhuaka ngaih a ni a, kum 2013 khan mi hausate intiamkamna The Giving Pledge-ah a hausakna tam zawk midang tana pe turin a intiam bawk.

Kum 2014 khan University of Zurich leh ETH Zurich ten damdawi lama thil thar ṭha zawk an hmuhchhuah theih nan dollar maktaduai 120 a lo thawh tawh a, kum 2018 khan khawvel boruak danglam zel tur ven nan kum sawm chhunga £800mtd vel a pek chhuah tur thu New York Times-ah a lo ziak tawh.

Midang?
American PR executive Barbara Charone chuan share a nei ve dawn a, The Guardian-in kum 2008-a Celebrity chher chhuak zinga thil titthei zual 20 a thlan zinga tel hi a thawhpuite anga sum ngah uchuak tak erawh a ni lem lo - Chelsea fan ruhkawl a ni.

British sumdawng hausa Jonathan Goldstein a tel ve bawk a, ani hi a company Cain International hlut zawng chu £8tld ni mah se a mimal sum neih zat erawh chiang faka sawi theih a ni lo.

British journalist Daniel Finkelstein chu Chelsea neitu thar zingah a tel a, ani hi The Times-ah executive editor lo ni tawh a ni a, British politics hrechiangtu a ni.

Chelsea neitu thar zingah mi hausa, thil tithei leh langsar an awm nual a, engtin nge an thawh ho zel ang, tih chu thil hriat châkawm a ni ta.

Chairman ngai
Chelsea-in neitu thar an neih avangin thil tam tak a inthlak danglam ang tih a chiang a, hetihrual hian club chairman Bruce Buck erawh Chairman a nih chhunzawm zel dawn.

March 2004 aṭanga Chelsea chairman ni tawh Buck hian club neitu thar Boehly nen hotu hna an chelh dun ang a, journalist Daniel Finkelstein leh public relations executive Barbara Charone te chu non-executive director an ni ang.

He thu buatsaih a nih lai hian Chelsea director Marina Granovskaia a cham chhunzawm zel dawn em a hriat loh a, ani hi Abramovich hunlaia player transfer leh contract thar chungchang buaipuitu ber a ni a, a cham a rinawm zawk.

Club neitu thar zinga mi Goldstein erawh Tottenham Hotspur fan a nih avangin Blues fans tam takin an duh lo a, hei vang hian nihna sang tak chu a chelh dawn lo niin an sawi.