Leeds & Everton an him lo: Chelsea tan chak a ngai

Zaninah Premier League inkhel hmuhnawm en tur a awm nual dawn a, English top flight league-a inhamtan tum Leeds United leh Everton inlan tur chu ngaihven hlawh zual zinga mi a ni.

Leeds hian zanin dar 12:00-ah Chelsea an mikhual dawn a, neitu thar nei Blues hi tun hnai an result avangin Champions League khel turin an dinhmun a derthawng leh tawh a, Leeds tan mikhual an châkawm lo.

Everton-in zanin dar 12:15-ah Watford an lenchilh dawn a, Roy Hodgson-a enkawl Watford hi an relegate tawh avangin khelh chhan an nei tawh lo - Leeds aiin Everton hna a hautak lo zawk.

Chutihrual chuan Hodgson-a'n season tharah Premier League club a enkawl tawh loh tur thu a sawi a, English manager hian a match hnuhnung lamah tal a hming chhe tur thup mawi a duh ang - Watford bakah hian Norwich City an relegate tawh a, team pakhat an la tla leh dawn.

Leeds beiseina
Season hmasa Premier League-ah football hmuhnawm tak an pho chhuak a, mahse, a season hnihnaah erawh an squad panna a lang - player an inhliam a, match a tam a, Leeds-in an tlin reng ta lo.

A tawpah coach Marcelo Bielsa meuh an ban phah a, Jesse Marsch an lalut. American coach hi a match hmasa pahnihah tlawm mahse, match nga chhung a zawnin an tlawm lo zui - vawi thum chakin vawi hnih draw an nei.

Mahse, season tawp hnaih Leeds fixture a hautak a, Manchester City leh Arsenal lakah a zawnin an tlawm. Match hnihah hian goal ruk an chhuah a, goal khat chiah an khung!

Leeds hi relegation zone-ah an awm mek a, 18-na an ni. An chung chiaha awm Burnley nen khelh zat inangah point hmuh zat a inang a, goal difference-ah an hniam zawk avangin relegate thei dinhmunah an ding - zanin an hmachhawn tur hi Chelsea ber kher an ni a, a awlsam dawn lo.

Hei le, Chelsea
Chelsea-in neitu thar an neih hnua an match hmasa berah Wolverhampton Wanderers chu 2-2 in an inhnehtawkpui a, Stamford Bridge-a inkhel an nih bawk avangin an result hi a duhawm lo hle.

London club hi March 13-a 1-0 a Newcastle United an hneh thleng kha chuan Champions League khel chiang tura ngaih an ni a, khatihlaia pangana Manchester United aia an sanna chu point kua lai a tling - match khatin an khel tlem bawk.

Mahse, Magpies ngam hnuah Blues-in ngai an awh leh tawh lo. Premier League match sarih an khelhah vawi hnih chiah an chak a, vawi thum an tlawm a, vawi hnih draw an nei. An result a ropui lo hle.

Chelsea hi table-ah pathumnaah an la awm a, pangana Tottenham Hotspur aiin point nga chauhin an sang tawh zawk. London club tan season thara Champions League khel turin tlawm a thiang tawh lo a, hnehna chan ngei an mamawh.

A har a ni
Chelsea boss Thomas Tuchel-a lu hai tizual turin Inrinni zanah FA Cup final khelh tur an nei a, Wembley Stadium-a an hmachhawn tur hi team form em em mai Liverpool an ni - he inkhel tur hi ngaihtuah tel a ngai.

Blues hian League Cup final-ah Liverpool an lo ngam lo tawh a, London club tan Merseyside club laka tlawm nawn hi a mualpho thlak dawn.

A tawi zawnga sawi chuan Tuchel-a'n FA Cup final atan player ṭha ṭhenkhat chawlh hahdamtir a mamawh. Hetihlai hian hliam vanga a chawlh hnuah Jorginho a lo kir leh tawh a, N’Golo Kanté-a'n training a la zawm lo thung.

Kante inlan a rinawm loh a, Jorginho tan Leeds laka inkhelh chu a la hma mah mah mai thei - Chelsea-in an ṭhat dan berin an khel thei dawn lo tih a chiang a, hei hi Leeds tan thil lawmawm a ni.

Everton - Engtin nge?
Merseyside club-in January 16-a Rafael Benitez an ban khan table-ah 15-na an ni a, khatihlaia 10-naa awm Leicester City an phak lohna chu point ruk chauh a ni a, Frank Lampard an lakluha an beisei chu 'him hram hram' lam ni loin top 10 chung lama season khar a ni.

Mahse, Lampard hnuaia an match hmasa parukah vawi khat chiah an chak a, a bak zawngah an tlawm vek - match ruknaa Wolves an ngam loh khan table-ah 17-na an ni a, relegate an sawi ri ṭan!

Wolves zawhah Newcastle United (1-0) an hneh mial a, beiseina an nei thar. Mahse, match hnih a zawnin an tlawm leh zui - Manchester United (1-0) an hneh ve leh khauh a, Leicester City (1-1) leh Liverpool (2-0) lakah an tlawm zui leh a, khua a var thei lo.

Mahse, Everton hian Lampard hnuaia a vawi khat nan an match hnuhnung pahnihah a zawnin hnehna an chang a, an team hneh hi Chelsea leh Leicester an nih avangin inrintawkna an neih belh ang - zaninah Watford an hneh chuan himna chance a sang sawt dawn.