Halep leh Azarenka an chak

Italian Open khelh laiah champion tura rinkai, hmeichhe world number 1 hlui pahnih Simona Halep leh Victoria Azarenka ten an match hmasa berah hnehna an chang, hetih lai hian Naomi Osaka erawh hliam vangin a inhnukdawk thung.

Rome khawpuia inelna neihah 2020 champion Halep hian Alize Cornet 6-4, 6-4 in a hneh. Romanian star hian January thla khan Australian Open-ah Cornet hi a ngam lo, tun ṭumah erawh set hnih an khelh chhungin a chungnung viau.

Set pahnihah Halep-i'n 5-1 in hma a hruai fal ve ve, hnehna chang mah se a service a hun ṭha tawk bik lo, vawi li ngawt a hloh - a khingpui service ṭum 11 a chhuhsak ve thung. A match lehpekah chuan Danielle Collins nen an inkhel leh ang.

Inkhel dangah Azarenka leh Viktorija Golubic te an inhmachhawn. Kar hmasa a khelh zawh tak Madrid Open-ah khan, player pahnih hi an match hmasa berah an lo intum tawh, tun ṭumah an intawng lehnghal.

Madrid Open-a chak zawk Azarenka bawkin 6-3 6-0 in hnehna a chang, chak tur hian darkar khat leh minute riat bak a mamawh lo. An intawn hmasak ai chuan a chak awlsam viau, set hnuhnung zawkah phei chuan game a hloh miah lo.

Player langsar dang Osaka erawh kerek hliam vangin a inlan thei lo. Japanese nula hi Sara Sorribes Tormo nena inkhel tur ni mah se a inlan thei lo, Tormo-i'n a match lehpekah Nuria Parrizas Diaz a tum ang.

Champion lai leh seeded pakhatna ni bawk Iga Swiatek leh Madrid Open champion Ons Jabeur te nizan khan an inlan a, result erawh kan hre hman lo.