Sunderland-in playoff final lut
Premier League club hlun ni ṭhin Sunderland-in indinthar leh turin kawng dik an zawh ṭan leh mek a, League One playoff final an lut.
Sunderland hian playoff semifinal-ah Thawhṭanni zan khan Sheffield Wednesday chu 1-1 in an inhnehtawkpui a, first leg-ah 1-0 a an lo chak tawh avangin 2-1 in an tlang.
Sheffield Wednesday hian Lee Gregory hmangin minute 74-naah goal hmahruai an khung a, first leg-a an si phurh an sut - minute 90 thlenga goal dang a luh loh avangin extra time khelh a ngai mai dawnin a lang hman.
Mahse, Sunderland vanneihna a her chhuak - Patrick Roberts chuan hun pek belh minute thumnaah si phurh a sut a, Black Cats (Sunderland sawina) hi playoff final a hruai thleng.
May 21 zanah playoff final khelh a ni dawn a, Sunderland hian season hmasa Championship aṭanga tla Wycombe Wanderers nen English second division league khelh an inchuh ang.
Premier League club ni ṭhin Sunderland hi 2016-17 season khan Championship-ah an tla thla a, kum 2006 hnua Championship an khelh leh hmasa berah insiamṭha loin League One-ah an relegate zui.
League One-ah an cham zui a, season hmasa khan playoff semifinal lo khel tawh mah se final an lut zo lo a, tun season-ah final an lut ta - Championship-a kir an beisei ang.
Season thara Championship khel turin League One aṭang hian Wigan Athletic leh Rotherham United chu league-ah pakhatna leh pahnihna an nih avangin an tling tawh a, pathumna aṭanga paruknaten playoff hmangin hmun ruak dang pakhat an inchuh leh a ni.
Football League One Promotion Playoff
Semifinal - First Leg
May 6, Zirtawpni Zan
Sunderland 1 - 0 Sheffield Wednesday
SUN: Ross Stewart 45'
May 5, Ningani Zan
Wycombe Wanderers 2 - 0 Milton Keynes Dons
WYC: Ryan Tafazolli 38'; Sam Vokes 82'
Semifinal - Second Leg
May 8, Pathianni Zan
Milton Keynes Dons 1 - 0 Wycombe Wanderers
MKD: Troy Parrott 26'
Agg-ah Wycombe 2-1 in an tlang
May 9, Thawhṭanni Zan
Sheffield Wednesday 1 - 1 Sunderland
SHW: Lee Gregory 74'
SUN: Patrick Roberts 90+3'
Agg-ah Sunderland 2-1 in an chak.
May 21, Inrinni Zan - Final
Sunderland 7:30 PM Wycombe Wanderers