Dybala leh Chiellini tan nomawi hnuhnung?

Zanin dar 12:30 hian Juventus leh Inter Milan ten Coppa Italia final an khel dawn. Stadio Olimpico, Rome-a inkhel tur hi Paulo Dybala leh Giorgio Chiellini te tan a pawimawh bik - Old Lady player an nih chhunga nomawi chawi theih hnuhnung ber ni tura ngaih a ni.

Dybala hian tun season tawp thleng daih bak contract a nei tawh lo. March thla khan Turin club hian contract thar a ziah loh tur thu an sawi tawh, nipui bazarah a thlawnin a duh zawng club a zawm thei dawn.

Argentine forward hi Inter Milan nen sawizawm a ni. Football Italia-in a tarlan dan phei chuan, a club thar tur a hmachhawn dawn niin an ziak. Transfer boruak erawh a tak ram a thlen hma chuan la danglam leh thei a ni.

Tun hnai khan Chiellini pawhin a chhuah tur thu a sawi, inkhelh la chawlhsan dawn chiah lo mah se inelna nem deuh zawk a hmachawn tawh ang. Kum 37 mi defender hi Juve player zinga upa ber a ni satliah lo, captain a nih avangin nomawi nena thlah theih a duhawm ang.

A zawna season kua zet Serie A nomawi an chawinaah khan Chiellini hi a tel vek, kuminah erawh league nomawi an chawi dawn lo. Tuna an beisei awmchhun chu Coppa Italia chiah hi a ni, champion an duhna a sang dawn hle.

Massimiliano Allegri nauten champion an duh ang thoin Inter pawhin an duh ve tho. Nerazzurri hian Serie A nomawi chu AC Milan kakah hloh thei dinhmunah an ding mek; Coppa Italia nen tala season khar an duh dawn.

Lautaro Martínez kawltu an nih avangin Inter hi team nem zawka dah a rem lo, striker tawnhriat nei ṭha Edin Dzeko an nei tel bawk - thlamuanna tham an ni. Juve tlarhnung tan ven ngun an ngai hle ang.