Relegation Battle - Thlirna Tawi

Season liam ta khan Brighton hian match hnuhnung pakua aṭangin point thum chauh an hmu a, vawi ruk zet an chak lo. Amaherawhchu point 36 an him pui thei a, 17-na nichungin season an khar. Tun season-ah Seagulls hian point 36 an hmu a, an him leh mai a rinawm. Match li khelh hmabak aṭangin season liam ta ang thoin point erawh an hmuh tam tawh kher lo ang.

West Ham hi 2018-19 season khan 10-naah an awm a, season tawp an khar ṭhat vang a ni. Hammers hian match hnuhnung pali aṭangin point 10 an hmu a, tun season-ah erawh tla thei dinhmunah an ding. David Moyes hote hian match li khelh hmabakah relegate thei dinhmuna ding pathum leh Champions League khelh tum Manchester United an hmachhawn dawn a, point 31 chauh an hmuh bawk avangin an elpuite aṭangin point hlawhchhuah ngei a ṭul dawn.

Watford dinhmun pawh West Ham ang thoin a derthawng hle. Season liam ta khan Hornets hian match hnuhnung pali aṭangin point khat chauh an hlawh chhuak a, chutichung chuan season tawpah 11-naah an awm. Tun season-ah erawh dinhmun hima awm turin point hmuh belh an la mamawh a, an khelh hmabak thlirin tla thei zinga mi an la ni.

Season liam ta khan Championship playoff-ah Aston Villa hian Derby County 2-1 in an hneh hram a, Premier League khel turin an inpet tling. English football inelna sang berah season khat chauh khel a, tla nghal thei dinhmunah an ding. Nizan khan Manchester United nen an inhmachhawn a, result kan hre hman lo. Villa tan beisei tur tlem a la awm a, match hnuhnung paliah Arsenal chu team khauh ber tura ngaih an ni a, an fixture aṭanga thlirin beisei bo chu a la ni bik lo.

AFC Bournemouth hian nizan khan Tottenham Hotspur an hmachhawn a, result kan hre hman lo. Season liam ta khan Cherries hian point 45 an hmu a, 14-naah an awm. Tun season-ah erawh Bournemouth dinhmun a chhe takzet, nizan lama Jose Mourinho hote an hmachhawn hnuah a sang pali zinga mi Foxes leh Man City te an hmachhawn lehnghal dawn. 2015-16 season aṭanga Premier League khel 

ṭan tawh Cherries hi Championship lamah an kir leh mai a rinawm ta hle.

Norwich City hian season liam ta khan Championship-ah nomawi an chawi a, Premier League khel turin an tling. Daniel Farke hote hian season ṭantirh lamah game mawi tak nen champion lai Manchester City an hneh a, Pep Guardiola hote an hneh bak chu chhuan tur an nei lo hle. Canaries hi match 23 zetah an chak tawh lo a, match li khelh hmabakah an chak vek a rinawm bawk si loh avangin relegate ngei tura ngaih an ni.