Croatia-in India thlen a hreh lo
India coach Igor Stimac-a te ram Croatia chuan Blue Tigers chu October leh November-a World Cup qualifier an khelh tur inbuatsaihna atan thlen an hreh loh thu an hrilh a, Croatian Football Federation president Davor Suker chuan All India Football Federation (AIFF) president Praful Patel hnenah lehkha thawnin an inhuamna hi a hrilh a ni.
FIFA World Cup 2022 qualification (AFC)-ah India hi Group E-ah Qatar, Oman, Afghanistan leh Bangladesh te nen an awm ho a, match nga an khelh tawhah point thum chiah la neiin chak an la nei lo.
Asian Football Confederation (AFC)-in fixture a tihchhuah 'chhin' ah India hi October 8-a Qatar mikhual tura tih an ni a, November 12-ah Bangladesh tlawhin an match hnuhnung ber chu November 17-ah Afghanistan mikhualin an khel ang.
Covid-19 vangin ram pawna zinchhuah a la theih lo a, sorkar lamin dan hi a thlahdul a nih chuan India hian Croatia hi a pan a rinawm - Blue Tigers hi Croatia FA chuan lo thlen a, friendly match lo buatsaih sak thlengin an inhuam a ni. Ram pawn zin hi a theih loh a, fixture hi thlak danglam a nih rih loh chuan AIFF hian Qatar an mikhualna tur hmun Bhubaneswar-a camp neih an duh ber a, hemi chungchangah pawh Odisha sorkar nen inbe tawna ruahmanna siam a ngai ang.