World number 1 Murray a tla

"Ka thil tih hi ka hrethiam lo," tiin Mischa Zverev chuan Andy Murray a hneh hnuah a sawi. Nimin khan world number 1 Murray chu Australian Open aṭangin vuak tlak a ni a, a hneh loh hi world number 50 a ni thung. Kumina Grand Slam hmasa berah hian champion lai Novak Djokovic chu second round-ah a lo tla tawh bawk!

Rod Laver Arena-a inkhelah Murray-a'n a service vawi riat zet a hum zawh loh avangin darkar thum leh minute 33 chhungin 7-5, 5-7, 6-2, 6-4 in a chak lo. Britain tlangval hi kum 2004 French Open hnuaah major tournament-a quar­terfinal a luh zawh loh lehna hmasa ber a ni.

Kum 29-a upa Murray chuan, "Hun pawimawh leh a hnufual hnuah pawh a rawn thawh leh theih miau avangin hnehna chan kha a phu a ni," tiin a sawi.

Britain tlangval Murray hian vawi 26 chiah unforced errors neiin ace ṭum 10 a siam thei. Amaherawhchu, mipa singles inkhela pawimawh berte zinga mi a service a hum ṭha tawk lo, Zverev hian break point vawi 17 ngawt hmuin ṭum riat a hlawhtling.

World number 1 Murray hian kum 13 chhungin Grand Slam inelna bikah hian final vawi 11 a khel a, vawi thum a champion. Final a khelh tawh zinga panga chu Melbourne-ah hian a ni a, hengah te hian Djokovic a ngam lo vek! Kuminah Serbian tlangval Djokovic a tla hma a, Murray atan nomawi chawi theihna kawng a inhawnga ngaih ni mah se a hun ṭha neih a chhawr ṭangkai zo ta lo.

Kum 29-a upa Zverev chuan, "Ka thiltih hi ka hrethiam lo. Nikhawhreloin hun eng emaw ti chhung chu ka awm ni maiin ka hria, point ṭhenkhat hmu tur khan engtiang takin nge ka vuak phei ṭhin tawh pawh kha ngaihtuah nawn loh chuan ka hre tawh mai lo! Hnehna ka chang chu a ni maiu mai si a," tiin a beisei phak loh result a neih thu a sawi. Zverev hian inkhelh ṭan hmain an result chu Murray-a kutah a awm thu inngaitlawm takin a lo sawi tawh bawk.

Nadal a tlo
Grand Slam vawi 14 cham­pion tawh Rafael Nadal chuan a tawnhriat ngah tawh chhawr ṭangkaiin kum 19-a upa Alexander Zverev chu 4-6, ,6-3, 6-7 (5-7), 6-3, 6-2 in a hneh hram. Inrinni zan inkhelah Spain tlangval Nadal hnehna chang turin darkar li leh minute ruk chhung zet a mamawh.

Kum 30-a upa Nadal chuan, "Rim takin ka bei a, hnehna ka chan theih nan ka theihna zawng zawng ka hmang a ni. Alexander hi tennis khawvel awptu a la nih ka ring a, tunah pawh a ṭha tawh takzet," tiin German rawlthar a dahsang thiam hle. Nadal hian Gael Monfils a hmachhawn leh ang.