Jesus ni loin chhandamtu chu Son Manchester City 2 - 2 Tottenham Hotspurs
Gabriel Jesus chu Manchester City jersey hain Etihad Stadium-ah a inlan a, minute hnih hnua a goal khung chu chakna goal turah ngaiin lawm hman viau mah se offside vangin pawm a ni lo. Brazilian forward inlan hma hian Son Heung-Min-a'n Tottenham Hotspurs siphurh a sut a, Korean tlangval hi Mauricio Pochettino hote tan chhandamtu a ni.
Inrinni zan inkhelah Hugo Lloris chetsual vangin Manchester City tan Leroy Sane leh Kevin De Bruyne ten goal an khung a, Tottenham-in an thiam vang liau liaua City tlarhnung ṭhiatin Dele Alli leh Son te hmangin an sut. Etihad Stadium-ah City leh Spurs 2-2 in an inhnehtawk a, Liverpool an chak loh avangin Mauricio Pochettino hoten pahnihna dinhmun an la luah a, Manchester United-in point khat chiah an hlawhchhuah bawk avangin paruknaah an awm bawk.
City an tho thei lo!
Everton laka 4-0 zeta an chak loh hnuah Manchester City-in chak tumin Spurs an nawr nghal a, mikhual team tana Jan Vertonghen a inlan loh a hriat a, Kevin Wimmer leh Tottenham tlarhnung an talbuai. Amaherawhchu City tlarhma a hriam tawk lo - Sergio Aguero, Raheem Sterling, Leroy Sane leh Pablo Zabaleta ten goal an khung thei lo.
Second half-ah City an vannei a, keeper Lloris-a'n Germany international Sane a tauh per avangin awlsam takin City midfielder hian minute 49-naah a khung a, hemi hnu minute ngana lekah French keeper hian a bawh
ṭhelh avangin De Bruyne-a'n goal hnihna a khung leh bawk.
Pep Guardiola a hlim a, Spanish manager hian tlarhnung phui beiseiin John Stones chu bench-ah ṭhuttir mah se City tlarhnung a la pawp tho. Spurs tan Dele Alli-a'n minute 58-naah a tauh lut a, Son-a'n minute 77-naah an siphurh sutna goal a khung leh bawk. City-in goal hnihna an chhuah hma hian Kyle Walker-a'n penalty area-ah Sterling a nam avangin penalty an beisei a, pek an ni lo. Hemi hnu hian referee-in dik thlapin substitute Jesus a tih goal chu offside vangin a pawm sak lo a, Brazilian forward hian chakna goal khung theihna hun ṭha a hlah bawk.
Eng nge an sawi?
Manchester City manager Pep Guardiola chuan, "Kan khel ṭha a, kan result erawh a vanduaithlak ṭhin. Kan lungngai a, pawi kan ti a, amaherawhchu ka player-te khelh dan erawh ka chhuang a ni. An phu tawk result an hlawh chhuak lo a ni," tiin chak phu zawk an nih thu a sawi.
Tottenham manager Mauricio Pochettino chuan, "Team pahnih tan inkhelh harsa tak a ni a, first half an khelh ṭhat zawk avangin chak an phu zawk pawh a ni thei a, second half-ah erawh kan inhnehtawk viau a ni. Goal hnih kan chhuah hnua kan tho leh thei kha a lawmawm a, inrintawkna kan ngah zia leh chak kan duhzia a lang a ni," tiin hun chanve hmalam an khelh chhiat thu a sawi.
Inkhel dang
Swansea-in Anfield an luhchhuah a, Liverpool 3-2 in an hneh. Swans tana Fernando Llorente goal hnih chu Reds-in Roberto Firmino hmangin sut mah se Gylfi Sigurdsson-a'n chakna goal a khung. Welsh club tan coach thar Paul Clement hnuaia an chakna hmasa ber a ni a, Liverpool erawh tun hnaia match an khelh tam an tuar tih a lang a, tlarhma lamah Africa Cup of Nations khel mek Sadio Mane awm loh a hriat bawk.
Selhurst Park-ah Everton-in Seamus Coleman goal hmangin hnehna an chang a, Sam Allardyce-a enkawl Crystal Palace relegation zone-ah an tla thla. West Brom-in Darren Fletcher leh Chris Brunt te goal ropui hmangin Sunderland 2-0 in an hneh a, Black Cats hi table mawngphahah an awm.
West Ham-in Dimitri Payet nei lo mah se Andy Carroll an nei a, English striker goal hnih leh Jonathan Calleri te goal hmangin 3-1 in Middlesbrough an hneh. Vitality Stadium-ah Watford-in Christian Kabasele leh Troy Deeney hmangin ṭum hnih hma hruai mah se mualneitu Bournemouth-in Joshua King leh Benik Afobe hmangin an sut a, 2-2 in inkhel a tawp.
Team Dinhmun
# Team Pld W D L GF GA GD Pts
1 Chelsea 21 17 1 3 45 15 30 52
2 Tottenham Hotspur 22 13 7 2 45 16 29 46
3 Liverpool 22 13 6 3 51 27 24 45
4 Arsenal 21 13 5 3 48 22 26 44
5 Manchester City 22 13 4 5 43 28 15 43
6 Manchester United 22 11 8 3 33 21 12 41
7 Everton 22 10 6 6 33 23 10 36
8 West Brom 22 9 5 8 30 28 2 32
9 Stoke City 22 7 7 8 28 34 -6 28
10 West Ham United 22 8 4 10 29 36 -7 28
11 AFC Bournemouth 22 7 5 10 32 39 -7 26
12 Burnley 21 8 2 11 23 31 -8 26
13 Southampton 21 6 6 9 19 26 -7 24
14 Watford 22 6 6 10 25 38 -13 24
15 Leicester City 21 5 6 10 24 34 -10 21
16 Middlesbrough 22 4 8 10 18 25 -7 20
17 Swansea City 22 5 3 14 26 51 -25 18
18 Crystal Palace 22 4 4 14 30 41 -11 16
19 Hull City 21 4 4 13 20 45 -25 16
20 Sunderland 22 4 3 15 20 42 -22 15