Jeje-a'n goal a khung leh ta

Mizo tlangval Jeje Lalpekhlua'n goal khung a ṭhulh thei lo - Inrinni zan khan Mohun Bagan chuan an mikhualna ramah Chennai City 2-1 in an hneh a, South Indian club hian Brazilian striker Marcos Tank hmanga goal hmahruai an khung zet hnuah Bagan-in Jeje leh Sony Norde hmanga chhangletin hnehna an chang ta zawk a ni.

Hnahthial tlangval Jeje-a'n hliam vangin league match hmasa lamah a hmel lan thei lo mah se goal thum a khung tling leh der tawh a, Kolkata club hian match li an khelh tawhah hnehna chang vekin champion turin kawng dik an zawh zel.

Mizo 10 awmna DSK Shivajians chuan an mikhual Churchill Brothers chu goal khat ve ve khungin an inhneh­tawkpui a, Seong-Yong Kim goal hmahruai chu Goan club tan Adil Khan chuan a sut. DSK tan Jerry Lalrinzuala, Jerry Mawihmingthanga leh Lallianzuala Chhangte te an inlan. Chanmari tlangval Jerry Mawia chu hero of the match-ah thlan a ni.

Shillong Lajong chuan match thum khualmuala a zawna an tlawm hnuah an mikhual Minerva Punjab chu Rupert Nongrum leh Asier Dipanda te goal khung hmangin 2-1 in an hneh. Meghalaya club tan Isaac Vanmalsawma leh Samuel Lalmuanpuia te chuan inkhel bul an ṭan a ni.