RECORD! Ronney

Manchester United tana goal khung tam ber chu Wayne Rooney a ni. Kum 31-a upa English forward hian Inrinni zan khan injury time-ah freekick aṭangin goal ropui a khung a, Stoke City laka point hlawhchhuahna goal hi United record siamna goal a ni nghal bawk.

Stoke City-in Spanish mid­fielder Juan Mata-a'n an lama a tih goal hmangin bet365 Stadium-ah hma an hruai a, United-in chhantu an mamawh. Khawvel player manto ber Paul Pogba danglamna hmuh tur a awm lo a, Zlatan Ibrahimovic-a'n zan dang a phak lo a, Henrikh Mkhitaryan-a'n a hmawr a bawk fuh thei lo a, Mata-a'n chance ṭha bik a hlah a, substitute Jesse Lingard crossbar a pet per bakah referee Mark Clattenburg-a'n Glenn Whelan handball vangin penalty a pe lo bawk.

Jose Mourinho hote tan beisei a bo tawh hnuah Marcus Rashford-a'n box sirah freekick a hlawh a, goal khung theihna tur niin a lang lo. Substitute Rooney-a'n a ke dinglamin goal kilah takah a pet kual lut a, Potters keeper Lee Grant tan dan ngaihna a awm lo. United leh Stoke 1-1 in an inhnehtawk a, Mourinho hoten match 17 chhung hneh loh tan tawng tawh lo.

Sir Bobby Charlton chuan, "Goal 249-na ka khung aṭangin kum 40 chu a liam ta a, he chawimawina hlu tak hi ngaiah ka nei hman hial tawh. Amaherawhchu ka record ka chan ta hi pawi ka ti lo ka tih chuan dawt ka sawi a ni ang a, chutihrualin Wayne hi ka lawmpui a ni. History lehkhabu ziahnaa a hming chuan hi a phu a ni," tiin United legend chuan a sawi.

Record siamtu Rooney chuan, "Ka record hi ka chhuang a, United ka zawm tirh khan ka beisei lo. He club-ah hian world class player ṭhahnem tak an khel tawh a, goal khung tam ber ka ni a lawmawm takzet. Team tana khel ṭhin ka ni a, chutihrualin football ka chawlhsan hnuah record hi chhuang takin ka nupui fanaute bulah ka la sawi thei ang," tiin a lawm thu a sawi. United captain Rooney chuan Sir Bobby Charlton-a'n dressing room-ah a lawmpui thu a sawi tel bawk.

United tana goal khung tam 10
Hming Goal
Wayne Rooney 250
Bobby Charlton 249
Denis Law 237
Jack Rowley 211
George Best 179
Dennis Viollet 179
Ryan Giggs 168
Joe Spence 168
Mark Hughes 163
Paul Scholes 155