Liverpool-ah Stevie G a kir
Premier League club Liverpool captain Steven Gerrard chuan a hmangaihna hmasa bansan thei loin Anfield-ah bawk a kir a, tun ṭumah erawh player ang ni loin youth team coach turin a ni thung.
Kum 36-a upa Gerrard hian kum 1998 khan Reds tan a match hmasa ber a khel a, 2014-15 season tawp lamah Anfield chhuahsana Major League Soccer club LA Galaxy zawmin November 2016 khan inkhelh a chawlhsan thu a puang a ni.
Captain fantastic tia hminglem an pek ṭhin Gerrard chuan, "Bul ka lo ṭan tawhna hmun ngeia ka kir leh thei hi ka lawm takzet a, chutihrual chuan he thutlukna hi lunglenna leh khawharna satliah avanga siam erawh a ni lo. He club tana ka tih theih leh pek theih hi ka ngaihtuah ber chu a ni," tiin amah chher liantu club hnenah pek let ve neih a duh thu a sawi.
Gerrard chuan sawi chhunzawmin, "He hmunah kir lehna remchang ka nei tih ka hriat rual khan ka hna chu pawimawh tak ni turin ka duh a, vawiina ka hnathawh tur hian coach ka nihna kawngah hmasawn zel turin nasa takin min pui dawn tih ka hriat rualin naupangte tana ka theihna leh thiamna ka hmang tur hian minti hlim takzet a ni," a ti.
Liverpool chuan Gerrard chuan a tawnhriat tam tak chhawr ṭangkaiin a hna chu ṭha taka a thawh theih tur thu an sawi a, naupang ho chher tura club kalphung leh nunphung a hriatna chu tu tan maha el phak rual loh a nih thu an sawi lang tel bawk.
Reds tana vawi 710 inlan thei Gerrard hian Liverpool tan nomawi pakua a chawi a, England tana inlan tam palina niin ram tan vawi 114 a feh chhuak a, England squad-a inelna lian tham vawi rukah telin inelna vawi thumah captain armband a hreng.