Real Madrid chhanhimtu captain Ramos
Match hnih chhung a zawna an tlawm hnua Real Madrid thawhlehna thlentu chu Sergio Ramos a ni. Real hian Inrinni zan khan an mikhual Malaga chu 2-1 in an hneh a, Zinedine Zidane-a naute tana goal hnih khungtu hi defender Ramos a ni!
Ronaldo aiah Ramos
Real Madrid tan Cristiano Ronaldo leh Karim Benzema ten goal khung ngeina tur nia ngaihah an khung lo ve ve a, Malaga tan winger Chory Castro chuan goal post a pet per bawk. Minute 35-naah rin loh lam aṭangin goal hmuh tur a awm a, Spanish defender Ramos chuan Luka Modric corner pet aṭanga ball lokal chu an hmahruaina goal ni turin a tauh lut.
Ramos-a'n a la duhtawk lo cheu. Minute 43-naah Real captain hian set piece aṭang thoin an goal hnihna a khung a, Toni Kross ball pet aṭanga Ramos-a goal khung danah Spain international hi a offside ngei niin lang mah se linesman berin a phar miau loh avangin Real-in chawlhlawkah goal hnihin hma an hruai.
Second half-a goal khungtu erawh beisei loh zawk Malaga an ni a, Juanpi chuan yard 15 vela hla aṭangin minute 63-naah goal khat a sut. Mahse, Santiago Bernabeu-ah goal hnih an phurh tawh avangin Malaga tan thawh a harsa tawh a, a zawna a vawi nga nan an tlawm.
Ronaldo an au el
Zinedine Zidane-a nauten match 40 zet tlawm hmel hmu loa an katluan hnuah a zawnin Sevilla leh Celta Vigo an ngam lo a, Malaga hmaah tlawm nawn an tum loh zia khelmual chhungah an lantir - hetichung hian goal khung ngeina tura ngaiha khung lo ṭhin Ronaldo leh Benzema te chu fan-ten an au el!
Zidane chuan a naute hi chhan nghalin, "Kan fan-te hian beiseina an nei sang em em a, mah se a chang chuan coach leh player te hian fan-te thlawpna kan nei tlat a ni tih hi kan hriat ve a ṭul a ni. Harsatna kan tawk a nih chuan fan-te chu in bengdai a, min thlawp tlat turin kan duh ṭhin a ni," tiin fan-te chet danah a lungawi lo.
Ballon d'Or leh FIFA Best Player chawimawina kawl mektu Ronaldo-an a match hnuhnung pathumah beisei a phak lo tluan chhuak zak a, France striker Benzema-a'n goal a khung miah lo bawk.
Marcelo a inhliam
Real left back Marcelo chu first half-ah hliam vanga lak chhuah a ni a, midfielder Luka Modric chu hun tawp hnaih lamah lakchhuah a ni bawk. Real hian tun dinhmunah hliam vangin Wales forward Gareth Bale, centre-back Pepe leh right-back Dani Carvajal te chu an chhawr thei lo mek a, hliam neih belh avangin Zidane lu a hai khawp ang.
French manager chuan, "Ronaldo leh Benzema ten tun hnaiah goal an khung thei lo a ni mai thei a, mah se ka tlarhma te goal khung theih loh ai chuan ka player zinga inhliam tam lutuk hian ka lu a ti hai zawk a ni," a ti.
Zidane chuan a player-te hliam dinhmun sawi nghalin, "Modric hliam hi a serious lo turah ka ngai a, Marcelo erawh sawi lawk theih a ni lo thung. Player pahnih hliam hi kan endik phawt ang a, engkim a chiang turah kan ngai," tiin a sawi.