Milan ngamtu Napoli

Napoli chuan Serie A nomawi chawi an tum ngam tih an lantir zel. Inrinni zan khan Napoli hian an mikhual AC Milan chu 2-1 a hnehin point 44 an hmu ta - an chungah AS Roma leh Juventus te chiah an awm.

Season hmasaa pa­hnihna Napoli hian duh­thusama ṭhain season bul ṭan lo mah se an insiam­ṭha tawh a, forward Lorenzo Insigne chuan Milan laka a league goal ngana khungin Napoli hma a hruai pui a, Jose Callejon chuan angle zim tak aṭangin an goal hnihna a khung bawk.

Milan hian second half-ah Juraj Kucka hmangin an siphurh sut ve mah se goal dang an khung zui thei lo a, hun pek belhah keeper Gianluigi Donnarumma rawn tlan chhuakin freekick aṭanga ball lo kal a tauh lut teuh hle.

Napoli hian tun hnaiah a zawnin inelna hrang hrangah match 14 chhung chu hneh loh nei loin an kaltluang tawh. Italian club pahnihte hi season thara Champions League khelh tum ve ve an ni. Milan hi kum 2014 hnuah Europe-ah an la inlan leh lo a, tunah hian league table-ah pangana an ni mek.

Napoli coach Mau­rizio Sarri chuan, "Inkhel ṭan aṭanga minute 10 chhungin goal hnih kan khung hman a, kha vang khan kawng hrang hrangah a awlsam phah. Chutihrualin kan khingpuite kha chak duha tuihal an nih miau avangin seconf half kha chu kan thawhrim a ngai hle," tiin a sawi.

Vincenzo Montella chuan a naute khelh danah lungngawi lohna tur a hriat loh thu leh inkhel thununtu ni chunga an chak lo chu pawi a tih thu a sawi ve bawk.