Leipzig-in Bayern an um zel

Bundesliga champion tur sawi thiam a la harsa. Nomawi kawltu Bayern Munich chuan Zirtawpni zan khan Freiburg 2-1 a hnehin an hmahruaina an sawh nghet a, an elpui RB Leipzig an awm mai mai bik lo. Kai thar Leipzig hian Inrinni zan khan Eintracht Frankfurt chu 3-0 a sawpin Bayern an um zel.

Bayern tan Lewandowski

Freiburg-in inkhel ṭan aṭanga minute lina lekah Janik Haberer hmanga goal khungin an mikhual Bayern an barakhaih chiang hle.

Champion lai Bayern tan Robert Lewandowski chuan chawlhlawk hma hretin Douglas Costa corner pet a volley lut a, an si phurh a sut. Poland international hian hun tawp hma chiahin Franck Ribery cross chu a awm a lo la thlain an chakna goal a khung leh bawk.

Bayern Munich tan Lewan­dowski-a'n Bundesliga-a goal a khung hnuhnung vawi 39-ah a club chu hnehna a chanpui vek, tun season league match 17 khelh tawh aṭanga point 42 hmuin hma­hruaitu an nih chhunzawm zel.

Goal hnih khungtu Lewan­dowski chuan, "Ribery hnen aṭanga ball ka dawn khan ka ṭhian­te pek leh hmasak ka tum a, mah se pass tur ka hmu mai lo. Hun leh hmun chep tak kara goal ka khung mai kha ka lawm a, ka vannei ve bawk," a ti.

Bayern manager Carlo An­celotti chuan a naute khelh dan chu lungawi thlak chiah lo mah se point thum an hmuh vangin a lawm thu a sawi a, "Kan khingpuite kha an khawng em em a, minute 90 chhung na takin min nawr thei reng," tiin Freiburg a fak tel bawk.

Leipzig an buai lo

Bundesliga-a an season khat­naah Leipzig chuan khawvel an barakhaih chhunzawm zel. Eintracht keeper Lukas Hradecky chu minute thumna lekah box pawna ball a khawih avangin hnawh chhuah a ni a, a bak zawng chu Leipzig chan a ni tawh.

Defender Marvin Compper chuan minute rukna lekah a club tana a legue goal hmasa ber khungin a team hma a hruai pui a, chawlhlawk hma chiahin Timo Werner chuan an goal hnihna a tauh lut bawk - goal hnuhnung ber hi defender Jesus Vallejo-a'n anmahni lama a tih luh a ni thung.

Inkhel dang

Season kal meka hneh loh la tawng lo awmchhun Hoffenheim chuan Sandro Wagner leh Leicester striker hlui Andrej Kra­maric te goal hmangin Augsburg 2-0 in an hneh.

Bundesliga mai ni loin European league lian panga a inlan club zingah Hoffenheim chiah hi tun season-a la tlawm lo an ni. Match 17 khelhah vawi sarih hnehna changin ṭum 10 zet chu an inkhingpuite nen an inhnehtawk - point 31 hmuin league table-ah pathumna an ni mek a, an hnuai chiahah hian season hmasa a pahnihna Dortmund an awm thung.