Hammers-ah Saints captain

West Ham chuan Southampton captain Jose Fonte chu kum hnih leh a chanve chhung atan an lalut a, a man zat atana an thehchhuah zat hi pound maktaduai riat a ni. Portugal inter­national man zat hi pound maktaduai khata pung thei tura tih a ni a, Fonte hian a duh chuan kum khat dang a contract a pawtsei thei bawk ang.

Kum 33-a upa centre back hian St. Mary's-ah thla 18 cham turin contract la nei mah se tun hnaiah club chhuahsan dilna a thehluh avangin Saints hian an chhuahtir a ni. Southampton director of football Les Reed chuan Fonte chu hlawh tam zawk hlawh turin contract thar ziahpui tum mah se amah berin chhuah a thlan zawk avanga chhuah an nih thu a sawi.

Euro 2016 nomawi chawi zinga mi Fonte chuan West Ham manager Slaven Bilic chu club dang sawmna hnawla Hammers a pan chhan a nih thu sawiin, "Min duh ve tak tak niin ka hria a, he club tana a tum leh ruahmanna a neih ten minti phur em em a ni," a ti.

Fonte hian kum 2010 khan Crystal Palace aṭangin Saints hi a zawm a, match 288 inlan sakin League one aṭanga Premier League an kai thlenga khel zinga player awmchhun a nih hnuah Saints a chhuahsan ve leh ta.