Match li atan Patric an hrem

Lazio defender Patric chuan Thawhlehni zana Lecce an hneh loh ṭumin Giulio Donati a seh a, khelmual aṭanga hnawhchhuah nghal a nih bakah match li chhung inkhel thei lo tura hrem a ni.

Kum 27 mi Patric hian team a hmachhawn theih loh tur zingah Juventus an tel. Serie A champion nen hian July 20-ah an intawng dawn a, a inlan thei lo tur hi a team tan channa a tling ang. Spanish player Patric chuan, "Thil tih loh tur ka tihpalh avangin ngaihdam ka dil, thinrim avang hian duh loh zawng leh thil mawi lo tihpalh theih a ni a, tun ṭuma mi hi chu ka tihpalh liau liau a ni," tiin a inthiam loh thu a sawi.