Pathumnaah Atalanta inhlangkai

Atalanta chuan Serie A match an khelh hnuhnung pakuaah hnehna an chang vek a, point 66 hmuin table-ah pathumna dinhmun an luah; an chungah hian Juventus leh Lazio te chauh an awm. Nilaini zan inkhelah Atalanta hian an mikhual Sampdoria chu 2-0 in an hneh, pahnihna Lazio an phak lohna chu point hnih chiah a ni tawh. Inkhel dangah Napoli chuan khualmualah Genoa 2-1 in an hneh ve bawk.

Serie A season kal laia goal khung hnem ber Atalanta-in chawlhlawk hmain goal an khung thei lo, second half-ah erawh an zia tak tak an chhuah. Rafael Toloi leh Luis Muriel ten goal khat ve ve khungin an team an chak pui.

League match 31 khelh tawh aṭangin Atalanta hian goal 85 an khung tawh a, anni aia khung hnem an awm lo. Nikum October thla khan Cagliari leh Sampdoria lakah goal an khung lo a, match dang zawngah chuan an khung vek.

Season hmasa khan Atalanta-in Champions League an khel phak a, an tih fuh palh a ni lo. UCL-ah hian quarterfinal an lut tawh, season tharah pawh European football inelna sang ber hi an khel chhunzawm leh ang.

Season chawmhma lama talbuai tak Napoli-in manager Gennaro Gattuso kaihhruaina hnuaiah hma an sawn zel a, league bikah tih sual nei zauh ṭhin mah se Coppa Italia nomawi an chawi thei. Serie A lamah pawh hma an sawn zel, paruknaah awmhmun an khuar mek.

Genoa mualah mikhual team tan Dries Mertens leh Hirving Lozano ten goal an khung a, mualneitu lamin Edoardo Goldaniga hmangin goal khat khung ve mah se kawngro a su phak lo. Napoli hian hrem vangin defender rinrawl Kalidou Koulibaly leh midfielder Diego Demme te an chhawr thei lo, nidanga an inkhel angin tlarhnung lam nghet tawk lo deuh mah se an mamawh point thum an hlawh chhuak.