Aizawl FC an sang zel Mumbai-ah Mizo club an chak
Pathianni zan khan Cooperage Ground-ah Aizawl FC-in Mahmoud Al Amna goal hmangin Mumbai FC an hneh.
Mizo club hi match thum a zawnin an chak tawh a, coach Khalid Jamil-a kaihhruaina hnuaiah match li khelah point 10 hmuin table-ah pathumnaah an invawrh chho bawk.
Inkhel dangah East Bengal-in an mual Barasat Stadium-ah Bengaluru FC an lehthal a, 2-1 in hnehna an chang. Lunglei tlangval Lalrindika Ralte captain-na hnuaia khel East Bengal hian AFC point hmuh zat ang chiah hmu mah se goal difference-a an ṭhat zawk avangin pahnihnaah an awm. Champion lai Blues hi palinaah an awm a, hmahruaitu chu Jeje Lalpekhlua khelhna Mohun Bagan an ni.
MK-a a inhliam
Aizawl FC winger H. Lalmuankima chu practice hnuhnung berah a ke veilam ke rekah hliam a tawrh avangin chhawr theih a ni lo a, Bawngkawn tlangval aiah Ashutosh Mehta chu a club hlui hmachhawn tura luhtir a ni. Ivorian forward Bayi Kamo Stephane a dam tawh a, captain Alfred Kemah Jaryan chu midfield-ah pawh let niin H. Lalbiakthanga'n bench-ah hun a hmang thung.
Mumbai FC defender Lalchhawnkima chu Bengaluru FC an khelh ṭuma a inhliam avangin squad-ah telh a ni lo a, coach Santosh Kashyap-a'n 'star' player-ah ka chhuah ang a tih Hitesh Sharma chu bul ṭantu zingah a telh a, foreigner awm chhun Densill Theobald leh veteran midfielder Steven Dias te erawh bench-ah dah an ni thung.
Fimkhur ve ve
Aizawl FC striker Kamo-a'n goal khungna hun ṭha a nei nghal a, Ivorian forward hian goal zawnah a pet lo. Striker ṭha zawk AFC-in an mamawh titu Mizo mipui ngaihdan a thlak thei lo. Goal chance awm hma mah se rin lawk ang ngeiin Khalid Jamil-a'n Mizo club chu game mawi a khelhpui lo a, Mumbai FC coach Kashyap lah chuti bawk - awmze neia goal nawr hmuh tur a tlem hle.
Mizo club an chungnung hret a, AFC midfielder Jayesh Rane ball fing chu Ashutosh-a'n keeper Laxmikant Kattimani chiah a hmachhawn hnuah a ti goal lo. Mumbai FC lamin AFC bang rinawm Zohmingliana Ralte, Eze Kingsley, Lalruatthara leh Lalrinzuala Khiangte te an su tlang thei lo a, keeper Albino Gomes-a'n hna a nei lo.
Al Amna bawk
Second half hmuhnawm hret mah se goal nawr a nat tawk loh ve ve avangin chak zawk an awm theih a rinawm loh.
Minute 80-naah player ṭha danglamna a lang a, Syrian midfielder Amna-a'n wing back Ruatthara um luh turin ball a pe lut a, Hmunhmelṭha tlangval ball pek let chu Amna hian goal awm chhun khung nan a hmang.
Chakna goal khungtu Al Amna hi RG Stadium-ahṭum hnih hero of the match-ah thlan a ni a, Mumbai-ah erawh khawtual tlangval AFC midfielder Rane chu hero of the match-ah thlan a ni.
Khalid a hlim
Aizawl FC coach Khalid Jamil hi Mizo club a enkawl hmain Mumbai FC hi kum sarih a enkawl a, hemi hma kum hnihah hian player a ni bawk.
Inkhelh banah Khalid chuan, "Mumbai FC kan hneh theih avangin ka lawm a, ka hlim ber ṭum a ni. Tunah chuan Mumbai FC-in attacking game an khel tawh a, an goal nawr pawh a na, kan intawn ṭumah erawh keeper Albino-a'n hna a nei lo - chu chuan engkim a tichiang," tiin ngeiawm takin a club hlui a kâp.
Khalid-a'n Mumbai FC a enkawl laiin defensive game a khelh ṭhin avangin sawisel a hlawh a, season liam ta khan pangana dinhmun hauh pha mah se Santosh Kashyap an ring zawk. Aizawl FC coach hian khelmualah phuba a la a, inkhelh banah a sawi lang ve zeuhah a ngaih theih.
AFC boss Khalid chuan, "Mumbai FC hi ka hmangaih a, he club tan hian ka theihna zawng zawng ka chhuah ṭhin. Club neituten ka chunga rinna an nghah avangin ka lawm a, he club lakah hian rilru chhia pu tur pawh ka ni lo a, ka pu ngai lo bawk ang. Tunah erawh club dang ka zawm tawh a, AFC neituten min ring ngam a, ka theihna zawng zawng ka hlan ang," tiin a sawi.
Aizawl FC hian January 28, Inrinni zan khian Chennai City FC an hmachhawn dawn a, vawiin hian Mumbai chhuahsanin Chennai an pan ang.