Nishikori lakah Federer a lian

A kum tam deuh tawh mah se Roger Federer thiamna a la nep lo, Swiss star hian Pathianni zan Melbourne Park-a inkhelah darkar thum leh minute 24 chhungin world number 5 Kei Nishikori chu 6-7(4), 6-4, 6-1, 4-6, 6-3 a hnehin a vawi 13 nan Australian Open quarterfinal a lut.

Grand Slam vawi 17 champion tawh Federer hi nikum Wimbledon hnua mimal inelna a khelh leh hmasakna ber a ni. World number 1 Andy Murray hnehtu Mischa Zverev nen semifinal luh inchuhin an inhmachhawn zui leh ang.

Kum 35-a upa Federer chuan, "Inkhel hautak leh ropui a ni a, chutah hnehna changtu ka la ni leh zel hi a nawmna tizualtu a ni," tiin a sawi. Federer hian a elpui ber ni ṭhin Rafael Nadal nen an dam ṭha a nih phawt chuan player hlauhawm an la nih thu a sawi bawk.

Kum 1991 US Open khan kum 39-a upa Jimmy Connors chuan quarterfinal a lo lut tawh a, Connors hnuah chuan Federer hi major tounament-a a sang pariat zinga tel thei upa ber a ni.

Last 16 inkhel dangah US Open champion lai Stan Wawrinka chuan Andreas Seppi chu 7-6 (7-2), 7-6 (7-4), 7-6 (7-4) in a hneh ve bawk a, Dan Evans hnehtu Jo-Wilfried Tsonga a hmachhawn leh ang.

Inkhel dang

Nimin khan Grigor Di­mitrov chuan Novak Djokovic hnehtu Denis Istomin chu 2-6, 7-6 (7-2), 6-2, 6-1 a hnehin quar­terfinal a lut ve bawk a, in­khel danga Dominic Thiem hnehtu David Goffin nen an inhmachhawn leh ang.

Belgian player zinga Australian Open quarterfinal lut hmasa ber ni turin Goffin hian khawlum tak hnuaiah Thiem chu 5-7, 7-6 (7-4), 6-2, 6-2 in a lo hneh ve bawk a ni. Nizan khan Nadal chuan last 16-ah France tlangval Gael Monfils a hmachhawn a, he thu buatsaih lai hian result kan hre hman lo.