Goal nen Costa a lo kir

Tun hnaia Chelsea chhuahsan tur anga sawi a nih hnu lawkah goal nen Deigo Costa a lo kir leh­nghal a, Pathianni zan khan Spain international striker hian Hull City 2-0 a an hneh ṭumin goal hmahruai a khung - Antonio Conte-a enkawl team-in Premier League-a hmahruaitu an nihna an sawhnghet zel.

Diego Costa-a'n inkhelh ṭan aṭanga second 10-na lekah goal shot a nei nghal a, Brazilian striker hi goal khung chakin a tuihal tih hmuh hmaih rual a ni lo. Fan-ten lawm taka an lo lawm let Costa hian first half injury time-ah goal a khung ta nge nge a, Stamford Bridge-a thawm chu ring tak a ni.

Hliam vanga Robert Snod­grass chhawr thei lo Hull City-in an player pawimawh tel loin an nawr let hleithei lo a, Chelsea defender Gary Cahill chuan minute 81-naah Cesc Fabregas free kick aṭanga ball kal chu an chak nemngheh nan a tauh lut.

Blues tan Costa

Kar hmasa lawk kha chuan Chelsea hi team talbuai an ni. Conte naute hian Premier League-ah hma hruai mek mah se London Derby-ah Tottenham Hotspur an ngam lo a, Leicester an hmachhawn ṭumin chhuak tur anga sawi Diego Costa chu squad-ah telh a ni lo bawk. Blues-in hma an hruai theihna kawnga an goal khung khawl hian Chinese Super League lam pan a tum nia sawi a ni a, Chelsea an buai ru.

Mahse, Costa a lo kir leh meuh chuan champion turin Chelsea hian theihna an nei a ni tihah rinhlelh tur a awm tawh lo. An league match hnuhnung 16-ah vawi 15 hnehna an chang a, Hull laka an goal chhuah loh kha tun season league match-a vawi 13 goal an chhuah miah lohna a ni nghal bawk. Blues hian points 55 nei tawh chungin league table chung ber an luah mek - league match 22 hnua hetiang zat point hmu thei team-in Premier League nomawi an chawi lo ngai lo.

Costa a nghet

Diego Costa-a'n a lo kirna inkhel­ah goal a khung a, Conte chuan Costa goal khung chu Atletico Madrid striker hlui chungchanga thuthang lengvel zawng zawng tawpna a nih nghal thu a sawi. Italian manager chuan, "Costa-a'n goal a khung leh ta a, fans, club leh amah ka lawmpui a ni. Vawiin goal kha thuthang lengvel zawng zawng tawpna a ni nghal bawk," a ti.

Costa-a'n CSL lam a pan dawn nia sawi a nih chhung zawngin Conte-a'n a player chu hliam vanga inkhel thei lo a nih thu sawi a, Conte chuan, "Khatihlai zawng khan dawt ka sawi lo. Mi tam takin Costa nungchang, a khelh dan leh thil chi hrang hrang sawiin min zawt a, mah se vawiina a khelh dan en kha chuan thutlukna dik tak ka siam a ni," tiin Costa a khelhtir chungchang a sawi.

Kum 28-a upa Costa-a'n a ngeiawm a chhuah leh hram a, goal a khung hnu lawkah a kut zaizir hmangin a chungchang ziak ṭhintu media ho a kap let. Conte chuan, "Dik taka sawi chuan Costa-a'n a goal khung a lawm dan kha hmuhnawm ka lo ti a, keipawn bench lamah hlim takin ka lo lawm ve a ni," tiin a player chu a chhan hle.

Ryan Mason dinhmun

Hull City midfielder Ryan Mason chu inkhel ṭan aṭanga minute 13-na lekah Cahill nen an intauh sual avangin lak chhuah a ni a, kum 25-a upa midfielder hi khelmual chhungah minute riat zet bawihsawm niin oxygen nen St. Mary's Hospital, London panpui a ni.

Ryan Mason hi a luruh a khi tih hmuhchhuah a ni a, damdawi inah hian zai nghal a ni. Hull chuan thuchhuah siam nghalin, "Ryan-a dinhmun a ngaihtuahawm loh a, damdawi inah ni rei lote chhung a la awm erawh a ngai rih dawn a ni, " an ti a, a chawlh hun chhung tur erawh an tarlang lo.

Inkhel chhehvel
• Premier League-ah Cesc Fabregas leh Wayne Rooney ten assist 101 ve ve an nei a, a tluk loh awmchhun chu Ryan Giggs (162) leh Frank Lampard (102) te chiah an ni.
• Diego Costa-a'n Chelsea tan match 100 a khelh tlinna chiah a ni a, Blues tan a goal 52-na khung nghal bawk.
• Opta-in 2006-07 hnua statistics mumal tak an siam hnuah Blues goal minute 51:35-naa lut kha first half (injury time)-a goal luh tlai ber ṭum a ni.
• Costa-a'n Premier League-a Hull a hmachhawn vawi liah goal a khung vek.
• Blues-in an khelmuala Premier League match-ah points 1,002 an hlawh chhuak ta a, 1000 chuang hlawh chhuak thei team pathumna an ni. (Manchester United 1,116 leh Arsenal 1,019).
• Antonio Conte-a'n Premier League match 22-ah point 55 a hlawh chhuak thei a, Jose Mourinho-a'n Premier League-a a match hmasa 22-a point a hlawhchhuah zat nen a in ang.