Arsenal dam nan Sanchez a tawk

Pathianni zan inkhelah Arsene Wenger hnawhchhuah ni mah se French manager hi mipui zinga ṭhu duh loin khelmual sirah a ding lui! Hei hian inkhel boruak san zia a pholang chiang hle.

Emirates Stadium-ah Shkodran Mustafi-a'n Arsenal hmahruaina goal a khung a, mualneitu dinhmun ṭha hman mah se Granit Xhaka hnawhchhuah a nih avangin minute 25 chhung chu player 10 nichunga an khelh a ngai a, injury time-ah midfielder Francis Coquelin-a'n penalty a chawi bawk.

Point hnih hloh ngei tura ngaih Gunners-in an huaisenna pho chhuakin hun tawp hma hreta Alexis Sanchez penalty hmangin hnehna an chang. Wenger-a naute hi kumtira Bournemouth laka goal thum chhuah hnua sut fai leh vektu kha an ni a, tun ṭuma an sual chhuah chu point khat a ni tawh lo - point thum a ni tawh. London-ah Premier League nomawi a let ngei a rinawm a, Chelsea ringawt ngaihtuah a thiang lo bawk.

Burnley an huai

Arsenal-in ball possession 70% zet changin inkhel thunun viau mah se Burnley tlarhnung an chesual duh lo a, first half-ah goal kan hmu lo a, Clarets keeper Tom Heaton chu player langsar a ni.

Second half-ah ṭhiante tana goal khung tur siamsak thiam Mesut Ozil a rawn inlar. Germany international corner pet chu ram tana a khelhpui defender Shkodran Mustafi chuan minute 59-naah an hmahruaina goal ni turin a tauh lut.

Buaina bul

Arsenal midfielder Xhaka chuan a ball hloh laklet a tumna lamah ṭul lo taka Steven Defour a tlawh avangin tun season-a a vawi hnih nan hnawhchhuah a ni. Swiss international hi match li chhung khel thei lo tura hrem tur a ni ang.

Kum 24-a upa Xhaka hian Burnley lakah ball pass a thiam zia a lantir a, hmun chep leh tepter tak aṭangin Ozil leh Sanchez te tan ball a pet chhuak hman zel a, red card a hmuh hma hian Gunners player zinga ball pass hnem ber a ni bawk - February 2 a Chelsea nen an inkhelh huna a inlan thei lo tur hi North London club tan channa a ni dawn.

Swiss international Xhaka hi thun hnai season thum chhungin vawi kua hnawhchhuah a ni tawh a, season hnuhnung pahnihah vawi nga red card hmu tawhin European league lian panga a khel player zingah ani aia hnawh­chhuah tawk ngun an awm lo!

A la tawp lo...

Goal khat an neih tawh avangin Wenger-a'n khung belh aiin venhim a ngaipawimawh zawk. Forward Alex Iwobi la chhuakin Coquelin dahluh a ni. France midfielder hian minute 93-naah Ashley Barnes a titluk avangin penalty a chawi a, forward Andre Gray-a'n an si phurh sut nan a hmang.

Xhaka hmunruak hnawhkhat tura dah luh French midfielder-in penalty a chawi lai hian Gunners fan-te chuan an captain hlui Patrick Vieira an ngai ngei ang. Arsenal hian tun season-ah penalty aṭangin goal kua an chhuah tawh a, Premier League club zingah penalty aṭanga goal chhuah hnem ber an ni.

Penalty an chawi vanga a lungawi lohna a lantir nasat avangin Wenger chu hnawh­chhuah a ni a, France manager hi mipui zinga ṭhu tura tih ni mah se khelmual sirah a ding zui!

Hun tawp dawnah inkhel boruak a sang thar a, manager ber a insum zawh loh avangin Gunners player-ten thapui an tawh zui. Chile international ball cross tauh tumtu Koscielny (offside!) chu Ben Mee-a'n a pet avangin penalty a chawi ve thung. France interantional Koscielny offside vangin Burnley an lawm lo a, Arsenal forward Sanchez-a'n goal-ah a chantir avangin result thlak danglamtu erawh a ni lawi si. Player 10-a khel Gunners 2-1 in an chak.

Eng nge an sawi?

Burnley boss Sean Dyche chuan, "Ka naute khan an tihtur dik tak an ni, tlarhnung an khawng ṭha a, ngun taka en chuan Koscielny kha a offside ngei a ni. Arsenal khan inkhel thunun viau mah se kan tihturah kan chiang a, kan hlawhtling teuh hle bawk, a chang chuan thutlukna dik lo kan tawrh a ngai fo," tiin hun tawp dawna an penalty chawi chungchang a sawi.

Arsenal manager Wenger chuan, "Hun harsa leh boruak rit hnuaiah pawh inthunun thei tur ka ni a, ka tih loh tur tawp ka tih avang khan ngaihdam ka dil. Chutih rualin khatiang thil kha chu inkhel vawi 10 zinga vawi kuaah hi chuan a thleng a, ka awmdan ang kha chuan ka awm fo - hnawhchuah turah ka inngai lo," tiin a chetdan a uchuak loh thu a sawi lang bawk.

French manager Wenger hian a lungawi loh vangin fourth official Anthony Taylor a nam. Kum 2012 khan New­castle manager Alan Pardew chu Tottenham nen an inkhelh ṭumin assistant referee Peter Kirkup a nam avangin match hnih a naute enkawl thei lo tura hrem a nih bakah £20,000 a lo ni tawh bawk. Premier League manager ṭang lai zinga a hna ngai chelh rei ber Wenger chunghchangah Football Association chuan thuchhuah an la siam lo.