Barcelona an chak chiang
La Liga nomawi chawi tura Real Madrid nena inum mek Barcelona-in tawlthluk nawn an tum tawh lo - Pathianni zan khan khualmualah Eibar chu 4-0 in an sawp a, MSN tia hminglem an pek Lionel Messi, Luis Suarez leh Neymar ten goal an khung kim vek.
Atletico Madrid erawh an che ṭha dawn chauh emaw tih hnuah an tawlhthlu leh ta a, hun tawp dawna Antoine Griezmann goal ropui hmangin khualmualah Athletic Bilbao chu 2-2 in an inhnehtawkpui hram.
Hei le MSN
Inkhel ṭan aṭanga minute 10-na lekah hliam vangin Sergio Busquets lakchhuah a ni a, Spanish mdifielder thlaktu Denis Suarez chuan minute 31-naah Barcelona tan goal hmahruai a khung. First half-ah Barca-in goal dang an khung chhunzawm lo a, chawlhlawk hman a ni.
Second half-ah Barcelona an nung sawt a, Eibar tlarhnung ten MSN an dang zo lo. Lionel Messi chuan chawlhlawk hman zawh a nih hnu minute ngana lekah goal dang a khung ve nghal a, Suarez siamsak a ni.
Uruguayan striker hian goal siamsaktu mai nih duhtawk loin Eibar defender Florian Lejeune ball a chhuhsak hnuah an goal thumna a khung ve leh a, Neymar chuan injury time-ah October 2 hnua league-a goal hmasa ber khungin Barcelona chakna a nemnghet.
Busquets-a inhliam
Barcelona coach Luis Enrique-a'n a naute hnehna chanpui mah se Busquets chu hliam vanga lakchhuah a nih avangin Catalan club lawm a kim lo. Spain international hi Barcelona chuan a ngal rekah hliam a tawrh thu inkhelh zawh hnuah an sawi.
Hliam vanga captain Andres Iniesta chhawr thei lo mek Enrique chuan, "Hnehna chang mah ila chanchinthar lawmawm lo tak nei chungin inkhel kan khar a ngai a, kan vanneihna erawh rin anga Busquets hliam a na lo hlauh hi a ni," a ti.
Enrique-a lawm
Barcelona coach Luis Enrique chuan, "Kan inkhelah khan lawmna tur tam tak ka hmu a ni. Inkhel ṭantir lamah beisei angin che thei lo mah ila kan insiamṭha thuai a, Eibar goal hmaah khan kan hlauhawm em em a ni," a ti.
Spanish manager chuan goal li lai khung mah se game harsa tak an hmachhawn thu sawiin, "Eibar khelmuala kal hi chuan kan ṭhat theih dan bera khelh a ngai fo ṭhin. Kan result aṭangin game awlsam tak kan khel angin lang mah se awlsam taka hnehna chang kan ni lo," tiin an khingpui team a fak.
Atletico chak zo lo
Athletic Bilbao khelmualah point thum hmuh beiseiin Atletico Madrid leng chhuak mah se Diego Simeone-a naute hian point khat bak an hawn thei lo a, hetichung hian inkhelh zawha lawm zawk chu mikhual team hi an ni!
Atletico Madrid tan Koke chuan minute thumna lekah goal hmahruai khung mah se mualneitu lamin Inigo Lekue hmangin minute 42-naah an si phurh sutna goal khungin Oscar de Marcos chuan second half-ah an hmahruaina goal a khung nghal bawk.
Simeone-a naute chhandam turin Antoine Griezmann bawk a ngai a, French forward hian Fernando Torres hnen aṭanga a ball hmuh chu mawi takin a khung. Team pahnihin goal dang an khung thei lo a, point an insem.
Hmasawn inti Simeone
Atletico Madrid coach Diego Simeone chuan, "Pahnihna Sevilla nena kan inthlauhna chu point sarih lai a ni ta a, season chawhma lama kan result inthlak reng hi chu a manganthlak a ni. Mahse, tun ṭuma kan khelh danah erawh hmasawnna ka hmuh avangin ka lawm a ni," a ti.
Argentine manager chuan sawi chhunzawmin, "Minute 30 hmalam kha chu ṭha takin kan khel a, counter attack-a kan buai ṭhin kha kan chak lohna lai chu a ni. Griezmann-a goal vangin chhanhimin kan awm a, game ṭha tak kan khel tih erawh hmuh hmaih rual a ni lo," tiin a naute a sawisel duh lo.