Juventus an sang tual tual

Italian champion Juventus chuan Serie A roreltu an nihna an chhem nung zel. Turin club hian Pathianni zan khan league nomawi an chawi tumna kawnga hnawksak ni phak Lazio chu 2-0 in an hneh.

Juve tan hian Paulo Dybala chuan minute ngana lekah yard 20 a hla aṭangin goal hmahruai a khung a, Juan Cuadrado thawhrah sengin Gonzalo Higuain chuan minute 16-naah an goal hnihna a khung bawk. Argentina international striker hian goal khat dang khung leh mah se offiside vangin pawm a ni lo a - goal dang a luh belh tawh lo.

Italian manager Massimiliano Allegri-a'n Juventus hi league match 300 a kaihruai ta a, tun season-ah bik hian match 20 khelh aṭangin point 48 an hmu a, an hnuai chiaha awm AS Roma aiin point khatin an sang zawk, match khatin an khel tlem zawk bawk.

Allegri chuan, "Kei chu a thu ni loin a taka hnathawk chi ka ni a, ka naute pawh hi ka ṭawngkam ni loin training-na hmunah a takin ka entir ṭhin. Player te hian harsatna leh buaina an nei a nih pawhin inpawh tlang takin kan sawi ho a, hma kan sawn zel theihna tur ka ngaihtuah ho ṭhin," tiin hlawhtling taka club a enkawl theih chhan a sawi.

Inkhel dang

League table-a pahnihna Roma chuan Manchester City striker hlui Edin Dzeko goal khat khung hmangin Cagliari 1-0 in an hneh. Luciano Spalletti enkawlna hnuaiah Roma hian a zawnin match 13 chhung chu an khelmuala league match an khelhah hnehna an chang tawh a, an club record awmsa an nih rual chiah.

Inter Milan chuan an elpui AC Milan lehpel turin Palermo chu Portugal midfielder Joao Mario goal khat khung hmangin 1-0 in an hneh. Inter hian a zawnin league match ruk chhung chu hnehna an chang ta a, point 39 hmuin league table-ah pangana an ni.