Saints lakah Foxes an zawr

Premier League champion Leicester City chuan tun season kal laiah khualmualah hnehna an la chang miah lo. Claudio Ranieri naute hi Pathianni zan khan Southampton lakah 3-0 in an tlawm a, league table-ah 15-naah awmin division hniama tlak thlak hlauhawm dinhmunah an ding zel.

St Mary's Stadium-a inkhelah Southampton tan James Ward-Prowse, Jay Rodriguez leh Dusan Tadic ten goal khat ṭheuh an khung. Saints hian league match an khelh hnuhnung paliah hnehna an chang zo lo a, kum 1998 a record an lo siam tawh chu nihrual turin match khat chak loh chiah an mamawh. Mahse, tunah chuan an record duhawm lo hi an thai bo rih a, league match 22 khelh aṭanga point 27 hmuin table-ah 11-na an ni.

Foxes hian tun season-ah khualmuah match 11 khel tawhin chak ni hmel an la hmu lo a, season hmasa kha chuan hengah te hian hnehna an chang vek. Italian manager kaihhruaina hnuaiah tho khelh ni mah se beisei an phak lo hle a, goal 37 chhuah tawhin nikum season pumpuia an chhuah (22 goals) aiin a tam tawh hle - Relegation zone aṭangin point nga chiahin an him rih.

Southampton manager Claude Puel chuan, "Kan mamawh hunah goal kan khung thei a, goal kan khung bakah hun ṭha tak tak kan insiam thei bawk. A zawna match li kan chak loh hnuah hnehna kan chang ve leh ta a, goal chhuah loa kan chak hi kan tan chuan duhthusam a ni," tiin a sawi.

Leicester manager Ranieri chuan, "Chelsea kan hmachhawn ṭumin tlarhnungah buaina kan tawk a, tun ṭumah erawh kan buaina chu midfield a ni thung. Ka naute hian siamṭhat ka tum dan hi an la man chiah lo niin a lang a, kan chak loh hi ka mawhphurhna a ni," tiin a sawi.