United tan Rooney a rinawm

Manchester United captain Wayne Rooney chuan Jose Mourinho-a hnuaiah beisei angin hmun chang tam tawk lo mah se Old Trafford-ah cham zel a tum thu a sawi a, club dang sawmnain a tibuai pha lo.

English striker hi tun hnaiah Chinese Super League nen sawi zawm an ni a, Guangzhou Ever­grande leh Beijing Guoan te chuan kar khatah £700,000 hlawhtir an inhuam nia tarlan niin United boss Mourinho chuan Rooney kalkawng dal a tum loh thu a lo sawi bawk si avangin chhuak tur anga sawi a ni hi a awm lo hran lo.

Mahse United tan goal 250 khunga club tana goal khung tam ber record a siam vanga Football Writers' Association-in chawimawina an pek Rooney chuan, "United tan ka rinawm a, he hmunah hian rei tak ka lo awm tawh a ni. Football hi game danglam tak a nih avangin eng pawh thleng thei a ni a, mah se United-ah hian ka hlim a ni," a ti.

Rooney chuan sawi chhunzawmin, "Match tam zawk khelh chu ka duh ngei alawm. Mahse, ka hlimna hmunah tak ka awm a, mimal tak pawhin he hmun hi nuam ka ti em em a ni," tiin chhuah a tum hmel loh hle.