Salah, i zunzam a ni

Liverpool-in Premier League nomawi an chawi dawn tih chiang tawh mah se an inthlahdah phah lo a, Nilaini zan khan tlak hlau Brighton & Hove Albion chu 3-1 in an hneh. 

Premier League champion tan Mohamed Salah bawk chu player langsar a ni a, Egyptian forward hian goal hnih a khung bakah goal khat hi a assist a ni - "Salah, i zunzam a ni," tih kan bang thei lo. Southampton laka mualpho hlim Manchester City-in an thiam an la theihnghilh lo tih khelmualah an pholang zui ve bawk a, Newcastle United chu 5-0 in an sawp. 

City tan Gabriel Jesus, Riyad Mahrez, Federico Fernandez (own goal), David Silva leh Raheem Sterling ten goal khat ṭheuh an khung a, dawl zawrin Magpies an zawr. 

Liverpool-in khualmualah goal khung turin harsatna an nei lo - minute rukna lekah Salah chuan goal a rawn khung nghal a, Naby Keita siamsak a ni. 

Reds goal hmasa ber hi Roberto Firmino chuan chhuih luhna remchang nei mah se Salah tan Keita ball pek chu mahni hmasial lo takin a kian a, Egyptian forward tan goal-a chantir turin harsatna a awm lo. Minute hnih a liam a, siamsaktuah Salah a ṭang ve thung. Firmino ball pek chu Henderson tana pet nuam tur tawk velin a chhawpsak a, Reds captain hian penalty box pawn aṭangin a khung. 

Brighton an beidawng duh bik lo. Liverpool goalkeeper Alisson tan hna an siam fo hnuah Leandro Trossard chuan si phurh a rawn sut ṭhen a, Tariq Lamptey-a ball pek a ṭhat tluk zetin a pet lut ṭha. 

Premier League-a inham tum Brighton an huaisen a, mahse player class a insan hleih miau avangin an che hleithei lo - minute 76-naah Salah bawkin Andrew Robertson-a corner aṭanga ball kal chu a tauh lut a, chak tur a chiang tawh. 

Liverpool-a a season hmasa bera rinhlelhna nena 'One season wonder' tia an sawi Salah hian tun season Premier League-ah goal 19 a khung tling leh ta der a, inelna hrang hrangah match 44 khelin goal 23 a khung tling ta. 

Salah hian Reds-a zawm hnuah Premier League match 104 khelhsakin goal 73 a khung tawh a, assist vawi 27 a nei - Liverpool tlarhma pathum Salah (94 goals), Sadio Mane (79) leh Firmino (77)-ten Reds tan inelna hrang hranga goal an khung zat chu 250-a tling ta bawk. 

Liverpool tan rawlthar duhawm Neco Williams chu Premier League-a a vawi khat nan inkhel bul ṭantir a ni a, kum 19 mi defender hi khel ṭha tia sawi tur ni lo mah se hmabak nei êng tak a nih avangin a tan chuan tawnhriat ṭangkai tak a la ni ang. 

Manchester City-in Newcastle lakah minute 20 chhungin goal hnih an khung a, Premier League-a him chiang tawh Magpies-in thih tha nena sual tur an neih tawh loh avangin chak tur a chiang hma. 

City tan hian Gabriel Jesus chuan minute 10-na lekah David Silva siamsak chu goal hmahruai a tan a khung a, match kua zet goal khung loa a awm hnuah a hun tawn thim chu a mangṭha thei ta. Minute 21-naah Mahrez chuan an goal hnihna a khung a, Kevin de Bruyne siamsak a ni thung. City-in goal khung pui mamawh lo mah se Magpies defender Federico Fernandez chuan Matt Ritchie-a ball petchhuah tum chu an lamah a ti lut palh a, City a pui. David Silva-a'n player class bik a ni tih pholangin freekick aṭangin an goal lina a khung a, hun pek belha Raheem Sterling goal khung chu City chungnunzia pholanna a ni.

•    Liverpool hian Premier League match 34 an khelh aṭangin vawi 30 hnehna an chang ta a, season khata vawi 30 chak tura match mamawh tlem ber an ni.

•    Liverpool hian league season khata vawi 30 aia tam chak an la nei lo a, 1978-79 leh 2018-19 season-ah vawi 30 ve ve an chak tling. 

•    Reds hian point 92 an nei tawh a, Manchester City-in point 100 hmua Premier League record an lo siam tawh chu khum turin an dinhmun a 

ṭha hle. 

•    Liverpool-in darkar sarih leh minute 47 zet chu inelna hrang hrangah khualmualah goal an khung tawh  lo a, Brighton lakah second 127 bak an mamawh lo. 

•    Liverpool tan Premier League goal 100-ah Salah a inrawlh ta a, Liverpool tana ti thei palina niin Steven Gerrard (212), Robbie Fowler (158) leh Michael Owen (148) te hnung a zui. 

•    Mahrez-a'n goal a khung avangin Manchester City chu Everton (1984-85) hnua English top flight club zinga season khata goal 10 khung thei player panga (Sterling, De Bruyne, Aguero, Jesus, Mahrez) nei leh hmasa ber an ni. 

•    Magpies hian season ṭantir khan 5-0 in Leicester City an ngam lo a, Premier League season khatah a vawi khat nan 5-0 a tlawm vawi hnih an nei. 

•    Kevin De Bruyne-a'n tun season Premier League-ah vawi 18 assist a nei ta a, 2016-17 season-a vawi 18 assist a neih hnua Premier League-a assist ngah ber record chu amah vekin a siam. 

•    David Silva-a'n Manchester City-a season 10 hun a hmang chhungin season tinin assist (inelna hrang hrang) vawi 10 tal a nei tling ziah. 

•    Manchester City hian tun season-ah point 33 an hloh tawh a, an season hnuhnung pahnih aiin point thumin an hloh hnem tawh zawk!