Kerber nomawi a keh

Angelique Kerber-i'n nikum khan Serena Williams hnehin a vawi khat nan Australian Open nomawi a chawi a, German nula hi kuminah champion tura rikai ni leh mah se Coco Vandeweghe hneh loin fourth round aṭanga vuak tlak a ni.

Pathianni zan Mel­bourne Park-a inkhelah world number 35 Coco Vandeweghe hian dakar khat leh minute riat chhungin 6-2, 6-3 in cham­pion lai Kerber hi a hneh a, quarterfinal-ah chuan French Open champion Garbine Mu­guruza a hmachhawn leh ang.

Kum 25-a upa Van­deweghe hian 2015 Wimbledon quarterfinal a lo khel ve tawh a, tun ṭum hi Grand Slam inelna bika a sang pariat zinga a inhlankai vawi hnihna chiah a ni.

German nula Kerber hian season hmasa khan Australian Open bakah US Open nomawi chawiin a khel ṭha hle a, world ranking-ah pawh Serena zuan khumin number 1 a ni hial - kuminah erawh beisei angin season bul a ṭan ṭha lo. Australian Open hma khan Sydney leh Brisbane-ah te a lo hlawhchham tawh bawk.

Kum 29-a upa Kerber chuan, "Inkhelh chhung zawngin ka theihna sang ber ka hmang chhuak thei lo tluan chhuak zak, vawiin chu ka tan ni duhawm a ni thei ngang lo a ni," a ti. Kerber a tlak takah chuan Serena tan WTA ranking chhuak tharah number 1 nih theihna kawng a inhawng leh ta.

Kum 18 hnuah

Nimin khan Mirjana Lucic-Baroni chuan Jennifer Brady 6-4, 6-2 hnehin quarterfinal a lut. Baroni hian kum 1999 khan Wimbledon quarterfinal a lo lut tawh a, major tournament-ah kum 18 hnuah a sang pariat zingah a inhangkai ve leh ta.

Kum 34-a upa Baroni chuan, "Thil tum leh duh ka nei a nih chuan a hlawhtlin theih nan theihtawp ka chhuah tur a ni a, a tawpah lungawina leh hlawhtlinna a awm ṭhin," tiin hlawhtlinna chang tura a thawhrim thu a sawi.